Lionel Messi ayaa lugta ku xirtay xarig casaan ah oo uu u arko inay tahay nasiib wanaag isagoo wadankiisa u qaaday Koobka Adduunka markii ugu horeysay muddo 36 sannadood ah.
Koobkii Adduunka ee Ruushka lagu qabtay sannadkii 2018, Joornaaliistaha reer Argentina Rama Pantarotto ayaa siiyay Messi xariga xasaan ah ka dib markii uu halyeeyga Barcelona seegay rigoore kulankii Iceland. Wuxuu u sheegay in xariga ay iska leedahay hooyadiis.
“Hooyadeey waxay ku jeceshahay in ka badan inta ay aniga i jeceshahay, waxaan sitaa xarigeeda casaanka si uu nasiib wanaag iigu noqdo, haddii aad rabto waan ku siin karaa” ayuu joornaaliistaha ku yiri waqtigaas Lionel Messi.
Panaretto ayaa mooday in kastoo Messi uu aqbalay inuu iska tuuri doono. Laakiin wuxuu farxad markii uu arkay Messi oo lugta ku xirtay ka dib goolkii uu ka dhaliyay Nigeria kulankii ugu danbeeyay ee wareega guruubyada.
“Hooyo… Messi wuu xirtay” ayuu ku qeyliyay Pantarotto oo muuqaal ka duubayay hooyadiis markii uu arkay Messi oo xiran xariga casaanka ah.
Wixi waqtigaas ka danbeeyay Messi ay jelcaaday fekerka ah in xariga casan uu yahay mid nasiib wata, wuxuuna xarig casaan ah siiyay Philippe Coutinho markii uu ku dhibtoonayay Barcelona sannadkii 2019kii.
Xiddiga reer Brazil ayaa xarigaas xirnaa xitaa markii uu u saxiixay Aston Villa. Ciyaartooy badan oo Argentina ah ayaa la arkay iyagoo xiran xariga casaanka ah ee nasiibka lagu sheegay.
Dabcan Messi iskama dhiibin xarigii la siiyay laakiin xarigyo kale oo u muuqaal eg ayuu u qeybiyay asxaabtiisa sida uu sheegay Paulo Dybala oo isna xarigaas ka helay Messi ka hor inta uusan goolkiisii ugu horeysay u dhalinin Argentina.
Goolhaye Emi Martinez ayaa isna gacanta ku xirtay xariga casaanka ah ka hor inta uusan rigoore ka badbaadinin Coman islamarkaana uusan Tchouameni ku qasbin inuu rigoorada banaanka mariyo.
Laakiin Messi ayaa caado ka dhigtay inuu xarigaas lugta ku xirto mar kasta uu ciyaarayo kulamada muhiim ah sida kulankii finalka ee uu hantay Koobka Adduunka.
