Halyeeyga kubada cagta Mesut Ozil oo Koobkii Adduunka ku sugnaa Qatar ayaa labo erey ku soo koobay sababtii xulka Faransiiska looga qaaday Koobka Adduunka ka dib guuldaradii ka soo gaartay xulka Argentina.
Argentina ayaa ku guuleysatay koobkeedii 3aad ee Koobka Adduunka ka dib markii ay rigoorayaal 4-2 kaga badiyeen xulkii ku guuleystay koobka sannadkii 2018kii.
Inkastoo Kylian Mbappe uu seddexleey dhaliyay hadana taasi kama badbaadinin guuldaradii rigoorada aheyd ee ka soo gaartay Lionel Messi iyo xulafadiisa.
Mesut Ozil oo garoonka Lusail ku sugnaa ciyaartii finalka ayaa labo erey ku soo koobay sababtii France looga qaaday Koobka Adduunka.
Wuxuu yiri: “Benzema La’aantii, Xafladi Ma Jirto” isagoo raaciyay emoji ku digasho ah iyo sawirka calanka Faransiiska.
Sababta uu Mezut Ozil qoray sidaan ayaa ah in tababaraha xulka Faransiiska Didier Deschamps uu si qalad ah xulka uga saaray Benzema isagoo ogsoonaa in dhaawaciisa uu uga soo bogsan karay kaliya seddex maalmood oo uu qeyb ka ciyaari karay wareegii guruubyada.
Laakiin Deschamps ayaa ku qasbay Benzema inuu xulka ka maqnaado inkastoo aan magaciisa liiska laga saarin. Markii uu Benzema taam noqdayna xulka France dib uguma soo yeerin iyagoo kaliya martiqaaday ciyaartii finalka balse wuu iska diiday.
Faransiiska ayaana tabay Benzema madaama Olivier Giroud iyo Ousmane Dembele ay kulankii finalka soo bandhigeen qaab ciyaareed aad u xun oo sababay in la bedelay qeybtii hore ee ciyaarta.
