Axadda waxay noqon doontaa maalin ay rumoobayso riyo weyn oo uu lahaa Sheekha Qatar. Waxa uu kulmin doonaa saddex arrimood oo uu muddo dheer ku taamayay.
Markii ay Faransiisku 2-0 kusoo garaaceen Morocco ee ay finalka kula ballameen Argetnina oo magaalada Doha ay Koobka Adduunka ku kala qaadi doonaan Axadda, waxa Shekh Tamim binHamad Al Thani uu la dhacay farxad isaga oo dareemay inay u rumowday riyadiisii.
Waxa uu Sheekhu muddo ku taamayay, in dalkiisu martigeliyo Koobka Adduunka iyo in labada xiddig ee Kylian Mbappe iyo Lionel Messi ay finalka iskaga hor yimaaddaan. Labadan xiddig ayaa u wada ciyaara PSG oo ay iska leeyihiin qoyska boqortooyada Qatar.
Sannadkii 2005, waxa Tamim bin Hamad Al Thani uu sameeyey furfurnaan iyo in da’yarta lagu soo jeediyo kubdda cagta. Waxa la aas-aasay shirkadda Qatar Sports Investment, waxaana toddoba sannadood kaddib ay iibsadeen kooxda horyaalka Faransiiska ee PSG. Tamim bin Hamad Al Thani ayaa 70% iska leh PSG, waxaana u maamula Nasser Al-Khelaifi.
Waxa kale oo Qatar ay martigelisay dhacdooyin ciyaareed oo badan, ka hor intii aan lasoo gaadhin martigelinta Koobka Adduunka 2022.
Nasser Al-Khelaifi oo isticmaalaya magaca Al Thani, waxa uu yahay madaxweynaha PSG waxaana uu kooxdiisa ku haystaa xiddigo waaweyn sida Neymar, Mbappe iyo Messi, iyadoo labada dambe ay hadda yimaaddeen finalka iyaga oo iska soo horjeeda, kuna ciyaaraya waddanka iska leh kooxdooda PSG ee Qatar.
Koobka Adduunka ee sannadkan, waxa uu ahaa midhaha mashaariico muddo sannado ah uu soo waday Tamim bin Hamad Al Thani oo ugu dambayntii guushiisa la arkayo. Shirkaddii Qatar Sports Investment ee uu sameeyey, waxa xiddigihii ay iibsatay ee PSG uga ciyaarayay ay hadda sare u qaadeen magaca iyo sumcadda dalkiisa Qatar, sidoo kalena waa xiddigaha Axadda ku dagaallamaya koobka uguqiimaha badan dunida.
Si kastaba ha ahaatee, Messi vs Mbappe iyo finalkii Koobka Adduunka oo lagu ciyaarayo Qatar waxay ka dhigan tahay in ay rumowday riyadii Tamim bin Hamad Al Thani.