Ciyaartoyda xulka Argentina ayaa ku heesay hees ay ku aflagaadeynayaan Ingariiska iyagoo tixraac ka dhigaya dagaalkii jasiirada Falklands ka dib markii ay garaaceen Croatia oo ay u gudbeen finalka Koobka Adduunka.
Xulka Argentina ayaa guul raaxo leh oo 3-0 ah ka gaaray Croatia iyagoo buukuntay booskooda finalka ee maalinta Axada.
Rigoore uu dhaliyay Lionel Messi iyo labo gool uu dhaliyay weeraryahanka Manchester City Julian Alvarez ayaa ka caawisay Argentina ay finalka ku sugaan midkood France ama Morocco.
Guushooda waxay keentay inay si weyn ugu dabaaldegaan garoonka Lusail Stadium iyadoo Messi iyo asxaabtiisa ay heeso la qaadayaan taageerayaasha.
Tababare Scaloni ayay kaamirada qabatay isagoo farxad la ooyay halka Messi uu laabta geliyay. Dabaaldegooda waxay sii wadeen markii ay gaareen qolka labiska.
Daafaca Nicolas Otamendi ayaa Instagram soo dhigay sida ay ciyaartoyda xulka ugu dabaaldegeen inay gaareen finalkoodii ugu horeysay tan iyo 2014kii markaasoo koobka ay ka qaaday xulka Jarmalka.
Heesaha ay Messi iyo asxaabtiisa Argentina ku qaadayeen qolka labiska waxaa ka mid ahaa mid ay ku aflagaadeynayeen dalka Ingariiska iyagoo ku heesayay”f***ing English”.
Sababta ay ciyaartoyda Argentina u aflagaadeynayeen Ingariiska ayaa ah in dowlada Ingariiska ay ka heysato jasiiradaha Islas Malvinas oo uu Ingariiska u yaqaano Falkland Islands.
Labada dal ayaa jasiiradaha ku dagaalamay sannadii 1982kii, marnaba Argentina ma ilaawaan in Ingariiska uu heysto qeyb ka mid ah dhulkooda, waana sababta ay ciyaartoyda xulka Argentina dabaaldegooda ugu aflagaadeynayeen Ingariiska.
Waxay sidoo kale ku maadsadeen xulka Brazil oo ku baxay gacanta xulkii ay iyagu reebeen ee Croatia.
Argentina ayaa dooneysa inay hanato Koobka Adduunka markii ugu horeysay tan iyo 1986kii.
