Tababaraha xulka qaranka Brazil ee Tite ayaa sharraxay sababtii uu beddelka ugu soo geliyey goolhayaha saddexaad ee xulkiisa ee Weverton kulankii ay xalay ku karbaasheen South Korea, kuwaas oo afar gool oo ay qaybsadeen Vinicius Junior, Neymar, Richarlison iyo Lucas Paqueta ay qaybtii horeba ku khaarajiyeen.
Brazil ayay u ahayd ciyaar ay ku dhamaysatay dabbaal-deg iyo bandhig heersare ah oo ay daqiiqadihii koowaadba la saaxiibtay shabaqa Koonfur Korea.
Garoonka Stadium 974 ayaa u ahaa mid aanay wax dhibaato ah kula kulmin, iyadoo toddoba daqiiqadood oo kaliya markii ay ciyaartu socotay uu Vinicius Junior gool qurux badan ugu aftaxay ciyaarta, halka daqiiqaddii 36aadna uu Vinicius caawiyey goolka afraad ee uu dhaliyey Lucas Paqueta, halka Neymar uu goolka labaad rikoodhe ku dhaliyey ka hor intii aanu Richarlison goolka saddexaad keenin.
Dhamaadka ciyaarta oo ay toban daqiiqadood ka hadhsan tahay ayuu Tite beddelay goolhaye Alisson, waxaanu keenay Weverton iyagoo uu kaydka fadhiyey Ederson oo kulankii Cameroon ciyaaray, waxaana ciyaarta kaddib uu tababaraha Brazil sharraxay go’aankiisa, isaga oo yidhi: “Aad ayay u fiicnayd in Weverton uu daqiiqado helay. Waxa aanu dareemaynaa in aanu ka farxino qof kasta oo halkan yimid, si uu noo taageero.”
Weverton oo ay da’diisu tahay 34 jir ayaa ahaa ciyaartoygii 26aad ee Brazil ay ciyaarsiiso Koobka Adduunka ee ka socda Qatar, taas oo ka dhigan in dhamaan ciyaartoydii uu tababare Tite soo xushay ay waqti heleen.
