Halyeygii Brazil ee Pele ayaa Khamiistii ku geeriyooday magaalada Sao Paulo iyadoo ay da’diisu ahayd 82 jir, waxaana dalkaas laga samayn doonaa saddex maalmood oo baroor-diiq ah oo fasax laga noqonayo shaqooyinka dalkaas.
Geeridiisa waxa sababayaa xanuunka kansarka oo ku dhacay oo uu muddo la jiifay, kaas oo markii dambe usii gudbay kalyaha iyo beerka.
Xiddigan geeriyooday ayaan waligii ka ciyaarin qaaradda Yurub ee ay ka dhisan yihiin kooxaha ugu waaweyn dunida, waxaana uu cimrigiisa ku qaatay laba kooxood oo kaliya oo ahaa Santos oo ka dhisan Brazil iyo New York Cosmos oo waddanka Maraykanka ah.
Pele oo ah ciyaartoyga kaliya ee taariikhda kubadda cagta saddex Koob Adduun ku guuleystay, ayaa waxa uu dalabyo ka helay Real Madrid xilligii ay dunidu u shidnayd ee uu guulaha waaweyn soo hoynayay, waqtigaas oo Real Madrid na ay shan Champions League oo isku xiga ku guuleysatay.
Sannado ka hor ayuu saxaafadda u sheegay in uu aad ugu dhowaa inuu ku biiro Real Madrid, laakiin uu go’aansaday inuu sii joogkooxdeeda keento Diego Maradona oo u ciyaaray intii u dhaxaysay 1984kii illaa 1991kii.
“Waxa jiray waqtiyo badan oo aan aad ugu dhowaa inaan u saxeexo Real Madrid, mar dambena kooxda Talyaaniga ee Napoli.” Ayuu yidhi Pele oo sannado ka hor bixinayay waraysi.
Waxa uu intaa ku daray: “Waxa kale oo i doonaysay Manchester United, laakiin anigu kama qoomamoonayo in aanan tegin Yurub, sababtoo ah waxa aan joogay Santos oo waqtigaas ahayd koox awood badan.”
19 sannadood oo uu u ciyaaray Santos kaddib, waxa uu u wareegay New York Cosmos, isaga oo kubadda cagtana ka fadhiistay sannnadkii 1975kii.
