Tababare Gareth Southgate ayaa shaaca ka qaaday in sababtii loo bedelay Harry Maguire kulankii ay ka badiyeen xulka Iiraan inay aheyd xumad qabatay darteed.
Daafaca Manchester United ayaa garoonka ku jiray ilaa daqiiqadii 70aad iyadoo England ay Koobka Adduunka ku bilaabatay guul weyn oo 6-2 ah.
Ka dib markii ay Iiraan gool soo ceshatay Maguire ayaa dhulka fariistay isagoo awoodi waayay inuu ciyaarta sii wato.
Labo ka mid ah shaqaalaha caafimaadka England ayaa garbaha ka galay oo ka caawiyay inuu garoonka ka baxo.
Southgate oo warbaahinta la hadlayay ka dib ciyaartii maanta ee Group B waxa uu sheegay in daafaca dhexe uusan dhaawacmin balse sababtii loo bedelay ay aheyd xumad qabatay.
Dhacdadaan ayaa dhacday wax yar ka dib markii uu Mehdi Taremi goolka u dhaliyay Iiraan.
Southgate ayaa qiray in Maguire uu xumadiisa ku wargeliyay kursiga keydka England wax yar ka hor inta uusan goolka dhalinin.
Tababaraha xulka Ingariiska ayaa yiri: “Harry Maguire wuu xanuunsaday, Wuxuu inoo sheegay inuu xanuunsanayo ka hor goolka.
“Ma jirin sabab uu garoonka ugu sii jiro oo uu u ciyaaro laakiin marka laga soo tago xumadiisa ma jiro walwal kale oo ku saabsan isaga.”
Maguire ayaa la filayaa inuu ka soo bogsado xumada islamarkaana ciyaaro kulanka ay England wajaheyso xulka Mareykanka.
