Kabtanka Argentina Lionel Messi ayaan ka fariisan doonin ciyaaraha caalamiga isagoo sheegay inuu doonayo inuu sii ciyaaro isagoo ah horyaalka dunida.
Messi ayaa labo gool u dhaliyay Argentina finalkii ugu xiisaha badnaa abid ee ay la ciyaareen France iyadoo 120kii daqiiqo ee ciyaarta ay ku dhamaatay 3-3 laakiin Argentina ayaa rigoore 4-2 ku badisay oo hanatay abaalmarinta ugu weyn kubada cagta.
Inkastoo ay da’diisu tahay 35 sanno jir, hadana Messi ayaa doonaya inuu u sii ciyaaro wadankiisa isagoo meesha ka saaray inuu ciyaaraha caalamiga ah ka fariisanayo.
“Kama fariisanayo ciyaaraha caalamiga ah” ayuu yiri. “Waxaan doonayaa inaan sii ciyaaro anigoo ah horyaalka Koobka Adduunka.”
“Waa waxa ugu quruxda badan ee jira” ayuu Messi u sheegay TYC Sports. “Eeg waxa aan gacanta ku hayo, aad ayuu u qurux badan yahay, si weyn ayaan u doonayay. Ilaah ayaa ila doonay inuu i siiyo, waxaa ugu jiray dareen ah inaan koobkaan ku guuleysanayo, waan u rafaadnay laakiin waan helnay.
“Dabcan waxaan rabay inaan waayaheyga ciyaareed ku soo xiro koobkaan, wax kale oo aan weydiisan karo ma jirto. Ilaah ayuu ku mahadsan oo i siiyay wax walba. Inaan waayaheyga ciyaareed koobkaan ku soo xiro waa wax cajiib ah.
“Ka dib koobkaan, maxaa kale oo ii haray? Waxaan ku guuleystay Copa America, Koobka Adduunka… wuxuu koobkaan ii yimid ugu danbeyn. Waan jeclahay kubada cagta, waa shaqadeyda. Waan ku riyaaqaa inaan qeyb ka ah xulka qaranka, waxaan doonayaa inaan sii ciyaaro kulamo kale anigoo ah horyaalka dunida.
“Ma sugi karo inaan Argentina tagno oo aragno sida dabaaldegeena uu waali u noqon doono.”
