Tababaraha xulka Portugal ee Fernando Santos ayaa gabi ahaanba diiday inuu xaqiijiyo haddii Cristiano Ronaldo noqon doono kabtanka hoggaamiya xiddigihiisa kulanka Switerland ee caawa.
Ronaldo ayaa u dhaqmay qaab aan fiicnayn markii bedelka lagu sameeyay kulankii South Korea, tababaraha ayaan la dhicin hab-dhaqankaas.
Kahor kulanka wareega 16-ka ee caawa, Santos oo saxaafada la hadlay ayaa si cad u sheegay inuusan jeclaysan hab dhaqankii Cristiano balse uu arrintaas la tacaalay oo xaliyay.
“Maan jeclaysan, maya gabi ahaanba, kamaan helin balse daqiiqadaas laga soo bilaabo waxkasta oo arrintaas ku saabsan way dhammaadeen” ayuu hadalkiisa ku bilaabay Fernando.
“Arrimahan albaabada xidhan gadaashooda ayaa lagu xaliyaa, waa la xaliyay. Arrintaasi way dhammaatay haatana qofkasta waxa uu diirada saarayaa kulanka berri”.
Santos ayaa mar la weydiiyay haddii uu Ronaldo yahay kabtanka xulkiisa ee kulankaas diiday inuu xaqiijiyo wuxuuna yidhi “Kaliya waxaan cida kabtanka noqonaysa go’aamiyaa marka aanu garoonka gaadhno, wali ma ogi waxa ay shaxdu noqon doonto”.
