Booliska Catalonia ayaa helay caddaymaha masuuliyiintii Barcelona ee fashiliyey heshiiskii ay kooxdaasi kula jirtay Lionel Messi iyo Gerard Pique, kuwaas oo loosoo dusiyey saxaafadda, taas oo kooxda ka dhax abuurtay qalalaase iyadoo ciyaaryahannadana ka cadhoodeen.
Saxaafadda Spain ayaa barnaamijyo kusoo bandhigtay faahfaahinta heshiisyadii ugu dambeeyey ee Barcelona ay u saxeexeen Lionel Messi iyo Gerard Pique ka hor intii aanay labadan ciyaartoy iskaga tegin naadiga.
Lionel Messi ayaa saamayn badan uu ku yeeshay fashilinta heshiiskiisa, waxaanay taageereyaashu si faahfaahsan u ogaadeen lacagaha waallida ah ee uu mushaharka u qaadanayay xilli ay kooxdu la dhibaatoonayso dhaqaale la’aan, waxaana sidoo kale mushahar badan ay kooxdu siinaysay Pique.
Sida ay baahisay idaacadda Cadena Ser, booliska Catalonia ayaa helay caddaymo buuxa oo muujinaya in agaasimihii guud ee hore ee Barcelona ee Oscar Grau iyo madaxii qaybta shuruucda Roman Gomez Ponti ay ku lug lahaayeen in heshiisyadan loo dusiyo saxaafadda.
Booliska ayaa hadda diyaarinaya warbixin buuxda ka hor inta aan labadan shaqsi maxkamadda la horgeynin iyadoo kooxda iyoc iyaartoydu ka noqon doonaan dhibbaneyaal.
Wargeyska El Confidencial oo daabacay xogta heshiiska oo ay usoo dusiyeen masuuliyiinta Barcelona, ayaa waxa uu sheegay, in Lionel Messi uu mushaharkiisu ka badanaa 55 milyan oo Euro sannadkii taas oo layaab ku noqotay taageereyaasha maadaama ay kooxdu waqtigaas iska bixin kari la’ayd mushaharka shaqaale hoosaaska iyaga oo uu jug weyn gaadhsiiyey fayraska Korona ee dunida ku keenay dhaqaale xumada.
Messi ayaa uu heshiiskiisani dhamaaday xagaagii 2021 waxaana uu iskaga tegay naadiga markii ay u kordhin waayaan qandaraaska, isaga oo ku biiray PSG.
Gerard Pique ayaa isaguna heshiiskiisa ku dhegsanaa illaa laga soo gaadhayey bishii November, waqtigaas oo uu go’aansaday inuu iskaga fadhiisto ciyaaraha.
