Weeraryahanka laga caydhiyay kooxda Al Nassr ee Vicent Aboubakar ayaa hadal gantaal ah kusii ganay kooxdaas oo u caydhinaysa sababta saxeexeeda cusub ee Cristiano Ronaldo.
Al Nassr ayaa kansashay heshiiska Aboubakar si ay u diiwaan galiyaan Cristiano maadaama sharciga horyaalka Sucuudigu dhigayo in koox kasta ugu badnaan siddeed ciyaartoy oo ajaanib ah haysan karto.
Haatan wargeyska Mundo Deportivo ayaa soo xigtay hadal uu Aboubakar ku tuuray Al Nassr kahor bixitaankiisa oo uu ugu horreyn soo wariyay NTV Sport isagoo sheegay inuu aaminsanaa in Lionel Messi ka fiican yahay Ronaldo balse uu midaas sii xaqiiqsaday kaddib markii uu kabtanka Portugal la tababartay.
“Waxaan markasta islahaa Messi ayaa ka fiican Ronaldo laakiin kaddib markii aan tababar la qaatay waxaan ogaaday inaan saxsanaa” ayuu yidhi Aboubakar sida NTV Sports lagu sheegay.
30 sano jirkaas ayaa 34 kulan u ciyaaray Al Nassr tan iyo markii uu kusoo biiray sanadkii 2021 isagoo 12 gool usoo dhaliyay mudadaas.
Aboubakar ayaa kaddib kansalida heshiiskiisa lala xidhiidhinayaa kooxda Besiktas oo u doonaysa bedelka Wout Weghorst oo Man United kusii jeeda.
