Xiddiga khadka dhexe uga ciyaara xulka qaranka Argentina ee Rodrigo De Paul ayaa difaacay kabtanka xulkiisa ee Lionel Messi oo rikoodhe khasaariyey ciyaartii Poland ee Arbacadii ee Koobka Adduunka, taas oo uu ku noqday ciyaartoygii ugu liitay Koobka Adduunka dhinaca rikoodheyaasha tan iyo sannadkii 1966kii.
Argentina ayaa u baahnayd guul si ay ugu soo gudubto wareegga labaad, balse fursaddoodii koowaad oo ahayd rikoodhe loo dhigay qaybtii hore ayuu Lionel Messi ka khasaariyey, ka hor intii aanay Alexis Mac Allister iyo Juan Alvarez dhalinin labada gool ee guusha siiyey.
Lionel Messi ayaa dhalliilo badan loogu jeediyey qaab ciyaareedkiisa kulankii Poland, waxaase difaacay Rodrigo De Paul oo saxaafadda la hadlay kaddib guushii ay gaadheen, waxaanu yidhi: “Lionel Messi waa kabtankayaga, isaga ayaana naakhuude ka ah doonta. Ciyaartii Mexico, isaga ayaa furay gool-dhalinta, maanta [shalay] haddii uu ku guul-darraystayna anaga ayaa muujinay in aanu garab taaganahay oo aanu taageerayno.
“Mar walba waxbaad ka baranaysaa guul-darrooyinka. Bilowgiiba waxa aanu muujinay dedaal badan iyo shaqsiyad. Waan ku faraxsanahay in aan xidhanahay shaadhka xulka qaranka Argentina. Waan jecelahay waddanka aan ku dhashay, wax walbana waan u huri doonaa shaadhkan.”
