Marcus Rashford ayaa xaqiijiyay inay hurdo la tagtay oo uu ka soo daahay shirkii kooxda taasoo keentay in kursiga keydka la dhigay kulankii Manchester United ay galabta ka badisay Wolves.
25 jirkaan ayaan lagu soo bilaabin ciyaartii ka dhacday garoonka Molineux taasoo dad badan ka yaabisay.
Tababare Erik ten Hag ayaa sheegay inuu Rashford kursiga keydka u geliyay inuu ku xadgubay dishibiliinka kooxda.
Laakiin ciqaabta Rashford waxay waartay kaliya 45 daqiiqo isagoo la soo geliyay qeybtii labaad, wuxuuna dhaliyay goolka guusha ka dib markii ay kubad isku taabteen Bruno Fernandes.
Ka dib ciyaarta, Rashford ayaa shaaca ka qaaday sababtii keydka loo geliyay.
Rashford ayaa sheegay inay hurdo la tagtay oo uu ka daahay shirkii kooxda, wuxuuna sheegay inuu ka niyadjabay go’aanka Ten Haf balse uu ogsoon yahay inay taasi tahay sharciga kooxda.
Wuxuu u sheegay BT Sport: “Sharciga kooxda ayaan ku xadgudbtay, waa qalad dhici kara.
“Dabcan waan ka niyadjabay inaan ku soo bilaabanin ciyaarta laakiin waan fahamsanahay go’aanka.
“Waan ku faraxsanahay inaan badinay ciyaarta, waxaan ka soo yara daahay shrikii kooxda, hurdo ayaa ila tagtay, waa wax dhici kara.”
