Qareen ayaa u soo bandhigay Lionel Messi inuu hal milyan doolar uga iibsado maradii madoobeyd ee loo yaqaano Bisht ee loo xiray markii uu kor u qaadayay Koobka Adduunka.
Ahmed Al Barwani oo ah qareen iyo xubin ka tirsan barlamaanka Cumaan ayaa dalabkaan soo bandhigay isagoo rajeynaya inuu maradaas taariikhiga ah ku hayo Bariga Dhexe.
Wuxuu Twitter ku soo qoray: “Anigoo ka wakiil ah Suldaanka Cumaan, waxaan kuugu hambalyeeynayaa hanashada Koobkii Adduunka ee Qatar 2022.
“Bisht-ga carbeed waa calaamad u taagan maqaam sarre iyo xigmad. Waxaan ku soo bandhigayaa hal milyan doolar anigoo kaaga bedelanaya marada Bisht.”
Marada madow ee loo yaqaano Bisht ayaa loo xiray Lionel Messi markii la gudoonsiinayay Koobka Adduunka, waana maro dhaqan u ah dadka carabta gaar ahaan dadka reer Qatar ee maqaamka sarre ku jira.
Marada Bisht waxaa la xirtaa kaliya waqtiyo kooban sida aroosyada iyo xafladaha waa weyn, waxaana loo arkaa ixtiraam weyn.
Al Barwani ayaa sidoo kale shaaca ka qaaday waxa uu ka damacsan yahay marada.
Waxa uu u sheegay The National: “Waxaan joogay garoonka waxaan si toos ah u daawanayay Amiirka Qatar oo Messi u xiraya marada Bisht.
“Waxay waqtigaas dunida u sheegtay waxa aan nahay, waana dhaqankeena, fadlan si fiican u ogaada.
“Waxaan dhigi doonaa madxad ai aan u maamuusno waqtigaan aan ku faani karno islamarkaana dib ugu milicsan karno, waxayna ina xusuusineysaa inaan sameyn karno wax walba.”
