Kooxda kubadda cagta Manchester United ayaa xiddig lama filaan ah ka dalbatay horyaalka waddanka Talyaaniga ee Serie A, kaas oo uu tababare Erik ten Hag kalsooni ku qabo heerkiisa gool-dhalinta balse ay caqabad tahay da’diisa weyn.
Weeraryahanka reer France ee Olivier Giroud ayaa si lama filaan ah uga mid noqday liiska ciyaartoyda ay doonayso Manchester United bishan January ee aynu ku jirto, waxaanay saxeexiisa u dhaqaaqi doonaan haddii ay waayaan Joao Felix oo ah dookha koowaad ee Erik ten Hag.
Sida uu qoray wargeyska The Times ee kasoo baxa Ingiriiska, Erik ten Hag waxa uu walaac weyn ka qabaa taam ahaanshaha Anthony Martial xilli uu kooxda ka tegay Cristiano Ronaldo oo heshiiskiisa ay kansaleen isla markaana ku biiray kooxda reer Sucuudi Carabia ee Al Nassr oo maanta usoo bandhigtay warbaahinta.
Weeraryahanka hore ee Arsenal iyo Chelsea ee Olivier Giroud oo ay da’diisu tahay 36 jir ayaa la sheegay in Erik ten Hag uu u arko ciyaartoy ay ka heli karaan goolal xilliyada ay kooxdiisu ku gacan-sarrayso ciyaarta, iyadoo uu ku qancay qaab-ciyaareedkii uu Giroud ka sameeyey Koobkii Adduunka.
Manchester United ayaa xilli ciyaareedkan oo dhan waxay dhalisay 24 gool oo horyaalka Premier League ah, waxaana ka goolal badan sagaal kooxood.
Marcus Rashford ayaa ah ciyaartoyga goolasha ugu badanay ka helaan, waxaana uu u saxeexay 11 gool oo dhamaan tartamada ah, halka Martial oo kasoo laabtay dhaawac uu muddo dheer ku maqnaa uu lix gool dhaliyey isaga oo afar ciyaarood kusoo bilowday.
Red Devils ayaa waxa bartilmaameedkeeda ugu weyn ee suuqa January uu ahaa Cody Gakpo waxaanse ka hor-qaadday Liverpool, waxaana hadda lala xidhiidhinayaa Joao Felix oo Atletico Madrid ay dalbanayso £18.5 milyan oo Gini oo ay tahay in United bixiso si ay amaah lix bilood ah ugu qadato.
