Kooxda kubadda cagta Manchester United ayaa dalab qiimihiisu hooseeyo ka gudbinaysa xiddig ka tirsan Real Madrid oo ay si fudud ku iman karayo Old Trafford marka la eego xaaladda uu kaga jiro Santiago Bernabeu.
Erik ten Hag ayay kooxdiisu raadinaaysaa weeraryahan ay isku xoojiso kaddib bixitaankii Cristiano Ronaldo, waxaana lala xidhiidhinayaa ciyaartooyo badan inkasta oo lagu garaacay laacibkii ay sida weyn u doonayeen ee Cody Gakpo oo ay Liverpool lasaxeexatay.
Ciyaartoyday magacyadoodu safka hore kaga jiraan liiska xiddigaha laga doonayo Old Trafford waxa kujira Joao Felix oo Atletico Madrid khaati ka taagan kaddib is-faham-darro u dhaxaysa isaga iyo tababare Diego Simeone oo qaab-ciyaareedka ay isku khilaafsan yihiin.
Sida uu qoray wargeyska Defensa Central ee kasoo baxa Spain, Manchester United ayaa waxay hadda doonaysaa inay la saxeexato weeraryahanka kooxda kubadda cagta Real Madrid ee Marco Asensio oo ay waliba qiime aad u hooseeya ku heli karayaan.
Warka ayaa sheegay in Manchester United ay diyaar la tahay lacag u dhaxaysa 15 milyan oo Euro illaa 20 milyan oo Euro, taas oo ay Real Madridna ku qanacsan tahay oo ay degdeg u aqbali doonto sababtoo ah heshiiskiisa ayaa waxa uu ku egyahay dhamaadka xilli ciyaareedkan illaa haddana ma ogolaanin in uu qandaraaska kordhiyo.
Real Madrid macquul ayay u aragtaa inay qiimahan ku iibiso xiddiga reer Spain haddii uu diido inuu heshiis cusub saxeexo labada toddobaad ee ugu horreeya bisha January.
26 jirkan oo sannadkii 2014 ay Real Madrid kasoo iibsatay Real Mallorca ayay boos la’aan ku haysataa Santiago Bernabeu waxaa auu kaliya dheelay 11 kulan oo dhamaan tartamada ah, sababtaas darteedna ayaana uu marar badan shaki ku geliyey in uu sii joogayo Los Blancos.
