Manchester United ayaa u jeedsatay xiddig aan laga filaynin oo ay horumar ka samaysay saxeexiisa saacadihii ugu dambeeyey, kaddib markii ay Chelsea ka afduubatay Joao Felix oo uu tababare Erik ten Hag doonayay inuu ku xoojiso kooxdiisa.
Red Devils ayaa suuqa ugu jirta weeraryahan u buuxiya booskii uu banneeyey Cristiano Ronaldo, iyadoo Erik ten Hag uu ku dedaalayo inuu afka hore ka dhiso naadigiisa si ay uga dallacaan kaalinta afraad ee ay ku jiraan oo ay ugu tartami karaan horyaalka.
Telefishanka ESPN ayaa sheegay, in Manchester United ay u dhow dahay saxeexa weeraryahanka kooxda RB Salzburg ee Benjamin Sesko oo ah 19 jir waxqabad badan oo ku fiican dhalinta iyo hal-abuurka intaba.
Benjamin Sesko ayaa hore loo sheegay in uu £20 milyan oo Gini ugu wareegayo RB Leiopzig, laakiin Manchester United ayaa isku dayaysa inay afduubato laacibkan, maadaama weeraryahannada tayada leh ee la heli karayo waqtigan ay aad u kooban yihiin.
United ayaa hore iskugu dayday saxeexa weeraryahanka reer Slovenia xagaagii laakiin waxa ka gaws-adkaygtay RB Salzburg iyadoo Red Devils na ay ka gaabisay inay la timaaddo dalab qancin karaya kooxdaas.
