Kooxda kubadda cagta Manchester United ayaa xaqiijisay inay isbeddel muhiim ah ku samayn doonto garoonkeeda Old Trafford sannadka 2024, gaar ahaan qaybta loo yaqaano Stretford End, taas oo yeelan doonta magac cusub oo loo bixin doono.
Manchester United ayaa sannadkii 1910-kii waxay garoonkeeda u bixisay Old Trafford, waxaana uu qaadaa taageereyaal tiradoodu tahay 80,000 qof, inkasta oo aan la ogolaanin in la buuxiyo oo dhawr kun oo kursi laga furay garoonka.
Sida garoomada kale ee dunida, marar badan ayaa dibu-dhis lagu sameeyey garoonkan, balse waxay Manchester United ku ilaalisaa in aanu hoos uga soo dhicin tirada baaxadda ama muggiisa, iyadoo ay ku rakiban yihiin 74,310 kursi oo inta badan buuxsama.
Sannadkii 1992kii ayay Manchester United dumisay qaybta loo yaqaano Stretford End ee garoonka, waxaana lagu sameeyey dibu-dhis halka sannadkii 2000 ay kooxdu cusboonaysiin weyn ku samaysay garoonka oo dhan oo laga dhigay mid casri ah.
Sidaas oo ay tahay, taageereyaasha Manchester United ayaa waxay dalbanayaan in wali aya kooxdu sii casriyeyso meelo ka mid ah garoonka, gaar ahaan Stretford End, taas oo ay kooxduna xaqiijisay inay samayn doonto, sida lagu sheegay war-saxaafadeed lagu daabacay website-ka Manchester United.
Qaybta isbeddelka lagu samaynayo ee Stretford ayaa ah meel si aad ah looga shaqeeyo oo ay fadhiistaan madaxda kooxda iyo taageereyaasha sannadaha badan sida xidhiidhka ah u goosta tigidhka dhamaan kulamada hal-mar, waxaanay kooxdu xaqiijisay in dadka haysta tigidhada xilli-ciyaareedka 2024/25 loogu beddeli doono kuraas meelo kale oo garoonka ah.
