Kooxda kubadda cagta Manchester United ayaa raadinaysa beddelka Cristiano Ronaldo oo toddobaadkan ay burburisay qandaraaskii ay kula jirtay, waxaana dib ugu rogaal-celisay xiddig ay weyday xagaagii oo ay dhawr jeer isku dayeen inay la saxeexdaan.
Tababare Erik ten Hag ayaa doonaya in kooxdiisa uu kusoo kordhiyo gool-dhaliye shaqo badan, si ay kaalmaha sare ee horyaalka Premier League ugu dagaallami karaan.
Red Devils oo ay horyaalka Premier League oo ay ku guuleysato ugu dambaysay toban sannadood ka hor, ayaa waxay doonaysaa in ay la saxeexato weeraryahanka kooxda RB Salzburg ee Benamin Sesko oo u ciyaara xulka qaranka Slovenia.
19 jirkan oo ay kooxdiisu heshiis la gaadhay RB Leipzig oo la filayo in xagaaga uu u wareego, isla markaana u saxeexo heshiis shan sannadood ah ayaa waxay Manchester United doonaysaa inaya bisha January gacanta ku dhigto.
Sida uu qoray wargeyska The Telegraph, tababare Erik ten Hag ayaa laacibkan oo shan gool dhaliyey, saddex kalena caawiyey 16 ciyaarood oo uu u saftay RB Salzburg, waxa uu u arkaa inuu yahay ciyaartoyga ugu habboon ee geli karaya booska uu banneeyey Cristiano Ronaldo.
Manchester United ayaa waxa sidoo kale lala xidhiidhinayaa weeraryahanka Inter Milan ee Lautaro Martinez, Victor Osimhem oo u ciyaara Napoli iyo Memphis Depay oo Barcelona ku dhibaatoonaya, laakiin hore ugu fashilmay Old Trafford.
Liiska weeraryahannada Red Devils ay danaynayso waxa kale oo ku jira gool-dhaliyaha xulka qaranka Holland iyo kooxda PSV Eindhoven ee Cody Gakpo.
