Manchester United ayaa u calaamadeysatay Yann Sommer inuu yahay bedelka goolhaye David de Gea.
De Gea oo 32 sanno jir ah ayaa qandaraaskiisa Manchester United wuxuu dhacayaa xagaaga 2023ka.
Kooxda waxay qiyaar u leedahay inay sannad kale ku kordhiso qandaraaskiisa laakiin weli sidaasi ma aysan sameynin.
Waxaa haatan la sheegayaa in kooxda Premier League ka dhisan ay durbaba suuqa kala iibsiga ka raadineyso bedelka goolhayaha reer Spain.
Wargeyska Jarmalka ka soo baxa ee Bild ayaa qoraya in Manchester United ay ka fiirsaneyso inay u dhaqaaqdo goolhayaha Switzerland Sommer.
33 jirkaan ayaa haatan u ciyaara kooxda horyaalka Bundesliga ka dhisan ee Borussia Monchengladbach, isagoo u saxiixay sannadii 2014kii, laakiin isna qandaraaskiisa wuxuu dhacayaa xagaaga soo socda markaasoo lagu heli karo si bilaash ah.
United ayaa lagu waramay inay xiiseyneysay Sommer xagaagii la soo dhaafay inkastoo ay ugu danbeyn amaah kula soo wareegeen goolhayaha Newcastle Martin Dubravka.
Sommer ayaa wadankiisa u saftay 79 kulan isagoo caan ku noqday inuu badbaadiyay rigooradii Kylian Mbappe ee koobkii Euro ee sannadkii la soo dhaafay markaasoo Switzerland ay ka talaabsatay France una gudubtay wareega 8da.
Wuxuu ku guuleystay xiddiga sannadka Switzerland seddex jeer oo kala duwan, wuxuuna qeyb ka ahaa shaxdii sannadka ee Bundesliga ka dib markii uu wacdarro dhigay xilli ciyaareedkii 2019-2020.
Waxaa la sheegayaa in De Gea lagu qasbayo inuu mushaharkiisa hoos u dhigo si uu qandaraas cusub uga helo Manchester United.
Haddii uu goolhayaha Spain baxo xagaaga waxay soo gabagabeyn doontaa 12 sannadood uu kooxda joogay.
