Kooxda kubadda cagta Manchester United ayaa wada-hadallo heshiis cusub oo shan sannadood ah kula ujirta weeraryahanka reer England ee Marcus Rashford, laakiin waxa ay iska diidday kooxdu in ay sharcigeeda u jabiso laacibkan oo qandaraaskiisu sii dhamaanayo.
Manchester United ayaa dejisay jaan-goyn cusub oo dhinaca mushaharka ah oo aan la dhaafi karin, waxaana ciyaartoyda hadda xayndaabkaa ka sarreeya lagu soo celin doonaa laynka loo jeexay in aanu mushaharku ka badan karin.
Red Devils oo ciyaartoygii ugu mushaharka badnaa ee abid soo mara uu ahaa Alexis Sanchez oo toddobaadkii ka qaadan jiray £500,000 Gini, ayaa waxa kale oo ugu xigay Ronaldo oo la rumaysan yahay in uu usbuucii u xaadiri jiray £430,000 Gini, waxaanay labadan ciyaartoy ka barteen cashar ah in mushaharka badan aanu xal ahayn, sidoo kalena xiddigihii ay lacagta badan siiyeen ay ku fashilmeen Old Trafford.
Ciyaartoyga kale ee mushaharkiisu badnaa waxa uu ahaa Paul Pogba iyo hadda oo David De Gea hoos looga soo celinayo £375,000 Gini.
Marcus Rashford oo 25 jir ah ayaa waxa uu hadda mushahar u qaataa £200,000 Gini, waxaana uu doonayaa in laba-jibbaar laga dhigo mushaharkiisa si uu heshiis cusub ugu saxeexo kooxda, laakiin Manchester United ayaa diiddan inay jabiso sharicigeeda cusub oo ah in aan ciyaartoyna la siinin mushahar ka badana £300,000 Gini toddobaadkii.
Bishii hore ayay Manchester United dhaqan-gelisay qodob siinayay inay 12 bilood ku kordhin karto heshiiskii ay kula jirtay Marcus Rashford oo soconaya illaa dhamaadka xilli ciyaareedkaan.