Manchester United ayaa soo qabatay kooxda kaalinta seddexaad ee Newcastle United ka dib markii ay 3-0 ku xasuuqeen Bournemouth oo marti ku aheyd Old Trafford halka Newcastle ay barbaro la gashay Arsenal.
Goolal ay kala dhaliyeen Casemiro, Luke Shaw iyo Marcus Rashford ayay Man United kaga talaabsatay kooxda Bournemouth iyagoo haatan 35 dhibcood la wadaaga kooxda kaalinta 3aad ee Newcastle laakiin Red Devils ayaa dhanka farqiga goolasha aad uga danbeysa Newcastle.
Shayaadiinta Cas Cas ayaa ciyaarta ku bilowday si raaxo leh iyagoo kubada koontaroolayay waxayna ku qaadatay kaliya daqiiqadii 23aad inay ciyaarta hogaanka u qabtaan, markii Casemiro uu shabaqa ku taabtay karoos uu soo dhigay Christian Eriksen.
Laakiin United waxaa dhaawac halis ah uu ka soo gaaray qeybtii hore ee ciyaarta Van de Beek oo fursad la siiyay kulankaan, iyadoo qeybtii hore lagu kala nastay 1-0 oo ay United hogaanka ku heysay.
Afar daqiiqo markii ay socotay qeybtii labaad Manchester United ayaa heshay goolkii labaad ee ay raadinayeen, wuxuuna ahaa gool qurux badan oo si fiican looga soo shaqeeyay.
Shaw ayaa kubad la dhexmaray Bournemouth ka hor inta uusan u baasin Fernandes oo sii quudiyay Garnacho kaasoo isna u celiyay Luke Shaw oo ku guuleystay inuu kubada dabamariyo goolhaye Travers.
Daqiiqadii 78aad Garnacho ayaa birta garaacay halka daqiiqadii ku xigtay uu goolhaye Travers sameeyay labo badbaadin oo isku xigta.
Daqiiqadii 86aad waxaa ciyaarta hurdo u diray Marcus Rashford oo dhaliyay goolka seddexaad. Shaw oo wacdarro dhigay caawa ayaa kubad baas fiican ku quudiyay Fernandes kaasoo u sii dhigay Rashford oo dhameystiray.
Daqiiqadii ugu danbeysay ciyaarta David de Gea ayaa ilaashaday shabaqiisa isagoo sameeyay badbaadin fantastik ah waxayna ciyaarta ku soo dhamaatay 3-0 oo ay Unite dku xasuuqday Bournemouth.
