Manchester United guul weyn kula soo laabatay Premier League ka dib markii ay 3-0 ku xaaqeen kooxda kaalimaha hoose ee Nottingham Forest oo marti ku aheyd garoonka Old Trafford.
Labo gool oo ay kala dhaliyeen Marcus Rashford iyo Antony Martial qeybtii hore iyo goolka 3aad uu dhamaadkii ciyaarta dhaliyay Fred oo bedel ku soo galay ayaa ka caawiyay United inay seddexda dhibcood xaqiijisato waxayna haatan hal dhibic kaliya ka danbeeyaan kooxda kaalinta afaraad ee Tottenham oo hal kulan sii hor ciyaartay marka loo eego Shayaadiinta Cas Cas.
Qeybtii hore ee ciyaarta waxaa iska heysatay Manchester United oo abuurtay fursadihii ugu badnaa islamarkaana ciyaareysay kubad weerar ah halka Nottingham Foresy ay ku adkeyd inay kubada isku dhiidhiibaan.
United ayaa hogaanka u qabatay ciyaarta daqiiqadii 19aad markii koorno uu soo tuuray Christian Eriksen uu shabaqa u qaaday Marcus Rashford oo si caqliyaysan u dhameystiray.
Seddex daqiiqo ka dib United ayaa hogeenkeeda dheereysatay markii kubad rogaalcelis ah oo ay qaadeen ay keentay inuu kubad baas dheer helo Rashford kaasoo kubada si fiican u koontaroolay ka hor inta uusan u baasin Martial oo shabaqa toogtay.
Dhamaadkii qeybta hore Nottingham Forest ayaa mooday inay gool soo ceshadeen markii Boly uu madax ku dhaliyay kubad laad xor aheyd oo la soo qaaday.
Markii hore VAR ayaa eegeysay in kubada uu gacanta ku taabtay laakiin waxaa taas ka soo hormartay inuu offside jiray sidaasi darteedna goolka loo diiday.
Nottingham ayaa si firfircoon ku bilaabatay qeybtii labaad laakiin waxaa bilowgiiba ka dhaawacmay Jesse Lingard oo ciyaarta laga saaray iyadoo Antony uu fursad gool loo fishay ka qasaariyay United ka dib baas uu ka helay Bruno Fernandes.
Goolhaye Hennessey ayaa labo fursadood kale ka beeniyay Martial iyo Rashford halka De Gea isna markiisa la tijaabiyay bartamihii qeybta labaad.
Fred ayaana ciyaarta hurdo u diray daqiiqadii 87aad isagoo bedel ku soo galay markii uu shabaqa ku hubsaday baas dhex bixis ah uu ka helay Casemiro.
Ciyaarta waxay ku soo dhamaatay 3-0 oo ay Manchester United ku garaacday kooxda Nottingham Forest oo ku jirta kaalinta 19aad ee kala sareynta horyaalka Premier League.
