Manchester United ayaa lagu waramayaa inay dalab ka gudbisay saxiixa xiddiga kooxda RB Leipzig, Josko Gravdiol.
Tababaraha United Erik ten Hag ayaa doonaya inuu xoojiyo kooxdiisa bisha Janaayo iyadoo muhiimada ugu sareysay uu siinayo daafac cusub.
Sida ay sheegtay Foot Mercato, Gvardiol ayaa ah bartilmaameedkiisa koowaad.
Red Devils ayaa la aaminsan yahay inay durbaba ka gudbisay daafaca xulka Croatia lacag gaareysa 86 milyan ginni.
Laakiin waxay tartan adag kala kulmayaan kooxaha Manchester City iyo Chelsea.
Inkastoo Chelsea ay iyadana dalab 77 milyan ginni ka gudbisay daafaca, hadana Manchester ayaa gudbisay dalabkii ugu sareeyay oo ah 86 milyan ginni oo ay ku jiraan lacago ku xiran sharuudo.
Gvardiol ayaa ka mid ah daafacyada sida weyn loo doondoonayo ee qaarada Yurub iyadoo ay ku tartamayaan kooxo dhowr ah.
Halyeeyga Manchester United Rio Ferdinand ayaa sheegay in daafaca uu ka mid yahay daafacyada ugu fiican ee uu ku arkay Koobka Adduunka.
Wuxuu yiri: “Waa inaan sheego inuu ahaa daafaca aan ugu jecelahay ee aan daawaday Koobka Adduunka ilaa iyo haatan.
“Awoodiisa way muuqataa, wuxuu ku faraxsan yahay difaacashada uu sameynayo, waa nin xoogan islamarkaana ku fiican cagta bidix.”
