Xiddiga khadka dhexe uga ciyaara Liverpool iyo xulka Brazil ee Fabinho ayaa sheegay in aanu magaciisa rasmiga ah ahayn midka loo yaqaano ee dhabarka ugaga qoran garanka uu ku ciyaaro ee Fabinho, balse ay jirto qiso kale oo ka dambaysa oo keentay inuu isticmaalo magacan.
Kubbad-burburiyaha Brazil ayuu magaciisa rasmiga ah yahay Fabio Henrique Tavares balse waxa uu caan ku noqdy Fabinho iyadoo la dheereeyey magaciisa.
Waraysi uu siiyey warbaahinta Sky Sports ayaa uu kusoo bandhigay xaqiiqada magaciisa iyo sidii uu ku yimid Fabinho iyadoo magaciisa rasmiga ah yahay Fabio, waxaanu yidhi: “Magacaygu ma aha Fabinho. Magacygu waa Fabio – Fabio Tavares laakiin haddii aanu nahay reer Brazil waxa aanu magac walba ku darnaa ‘inho’, sidaas ayaanay iigu yeedheen Fabinho, illaa maantana waxa aan ahay Fabinho.”
Fabinho waxa uu magaciisa kala tashaday hooyadii markii uu caanka noqday, waxaanay ku waafaqday dadka kale ee reer Brazil in magaciisa lagu daro ‘inho’.
“Hooyaday ayaan weydiiyey markii aan xirfaddayda kubadda cagta bilaabay, midka ay door-bidayso – Fabinho ama Fabio – waxayna ii sheegtay Fabinho, sidaas ayaan ku qaatay Fabinho.”
Fabinho oo hore ugu soo ciyaaray kooxaha Monaco, Rio Ave iyo Real Madrid ayaa waxay kubaddiisu kusoo baxday AS Monaco oo uu uga ciyaari jiray difaaca midig iyo khadka dhexe intaba, balse markii uu yimid Liverpool ayaa waxa uu Jurgen Klopp u daayay kaliya inuu ka dheelo booska kubbad-burburinta oo ah booska uu ugu fiican yahay.
