Arsenal ayaa xiisaynaysa weeraryahanka kooxda Atletico Madrid ee Matheus Cunha iyagoo u raba bedelka mudada gaaban ee Gabriel Jesus oo ka dhaawacmay sida lagu dhigay wargeyska Evening Standard.
Tababare Mikel Arteta ayaa war naxdin leh helay inta Koobka aduunku socday kaddib markii uu dhaawac jilibka ahi gaadhay Jesus oo muhiim u ahaa tartanka ay horyaalka Premier League ugu jiraan.
Eddie Nketiah ayaa ah ku xigeenkii booska No.9 ee Jesus balse maaha mid ay Arsenal ku tashan karto mudada saddexda bilood ee uu maqnaan doono xiddiga Brazilian-ka ahi.
Arsenal ayaa haatan Premier League shan dhibcood hoggaanka kaga haysa Manchester City waxayna doonayaan inay sii joogteeyaan farqigaas.
Jesus ayaa shan gool u dhaliyay Gunners tan iyo markii uu 45-ka Milyan ee pound ugaga soo biiray Man City, mudooyinkii ugu dambeeyay ayuu abaar dhinaca goolasha ah ku jiray balse wali waxa uu muhiim u ahaa isku xidhka kooxdiisa.
Cunha ayaa isagu doonaya inuu iskaga tago Atletico kaddib kaliya 15 bilood oo uu kooxda joogay isagoo boos ka waayay macalin Diego Simeone.
Arsenal ayay saxeexa Cunha kula tartamayaan kooxaha kale ee Leeds United, Aston Villa iyo Wolves xilli heshiiskiisa Rojiblancos 2026 ku eeg yahay.
Matheus Cunha ayaa 54 kulan oo uu Atleti ilaa haatan usoo ciyaaray toddoba gool usoo dhaliyay.
