Daafacii hore ee kooxda Liverpool ee Jamie Carragher ayaa kooxdaas u sheegay waxa ku waajibka ah haddii ay doonayso inay afarta kaalmood ee sarre kaga dhammaysato Premier League xilli ciyaareedkan.
Reds oo xilli ciyaareedkan joogtayn la’aan ku dhiban ayaa xalay guuldarro 3-1 ah kala soo kulmay Brentford oo ay Gtech Community Stadium ku booqdeen.
Rajada afarta sarre ee Liverpool ayaa kulankaas kaddib u muuqata mid markale adag halka kooxda lagu naanayso shinidu ay booska toddobaad soo fadhiisatay.
Carragher oo Sky Sports xalay ku aragti dhiibtay ayaa sheegay inaysan kooxdu u ciyaarayn sida tababare Jurgen Klopp ciyaartoydiisa lagu yaqaano isla markaana ay u baahan yihiin saxeexa khad dhexe si ay afarta sarre fursad ugu helaan.
“Midaas ma arko imika, maaha koox Jurgen Klopp waxaanan doonayaa inaan ogaado sababta sababtoo ah ma fahmi karo, waxay haystaan ciyaartoy farsamo wanaagsan oo soo baxaya balse uma muuqdaan koox Jurgen Klopp” ayuu yidhi Jamie.
“Dib u cusboonaysiin dhammaystiran ayay uga baahan yihiin khadka dhexe, waa sida inay isku dayayaan inay u ciyaaraan qaabka Jurgen Klopp iyagoon ahayn ciyaartoy Jurgen Klopp, waa sida koox caadi ah marka la eego dhinaca cadaadiska haddana wali waxay ciyaarayaan xariiqa dheer (High Line – daafaca hore usoo baxaya)”.
“Waxaynu ka hadlaynaa Van Dijk, isagu qaabkiisii ugu fiicnaa kuma jirin balse si kasta ood u wanaagsan tahay ilaalo ayaad uga baahantahay khadkaaga dhexe, haddii aanad ilaalo helin wax fursad ah ma haysatid”.
