Tababaraha xulka qaranka Sucuudiga ee Herve Renard ayaa weerar afka ah ku qaaday kabtanka xulka qaranka Argentina ee Lionel Messi, kaddib markii ay shalay ku garaaceen kulankoodii koowaad ee Koobka Adduunka.
Herve Renard ayaa guul soo laabasho ah ku hoggaamiyey Sucuudiga, waxaanay ka daba yimaaddeen Argentina oo gool rikoodhe ah uu Lionel Messi ugu furay ciyaarta, iyaga oo ugu beddelay 2-1. Guusha Sucuudiga ayaa waxay soo afjartay 36 ciyaarood oo xidhiidh ahaa oo aan marna laga badin Argentina, taas oo kasoo bilaabantay sannadkii 2019.
Tababare Herve Renard ayay saxaafaddu ku xoontay shalay, waxaanay mid walba gaarkeeda ula yeelatay waraysi ay ku doonayaan inay hadallo ka duwan kuwii uu hore u yidhi kaga helaan, maadaama ay ahayd dhacdada ciyaareed ee ugu weyn guusha uu xulka Sucuudigu ka gaadhay Argentina oo ah waddanka koowaad ee loo saadaalinayo Koobka Adduunka.
Warbaahinta ayaa weydiisay Herve Renard sida uu u arkayay Lionel Messi intii ay ciyaartu socotay, waxaana uu si lama filaan ah ugu sifeeyey ciyaartoy aan dhiirranaa lahayn, waxaanu yidhi: “Bal qiyaas, Lionel Messi ayaa ka hor yimid oo la ciyaarayay Sucuudi Carabiya. Waxa uu odhan doonaa waa in ay si fiican ku bilowdaan oo ay guuleystaan, laakiin waxa aad ogtihiin in aanay dhiirranaantiisu la mid ahayn sida mrka uu laa ciyaarayo Brazil.”
Herve Renard ayaa hadalkiisa laga dhadhansanayaa in uu dareensan yahay in Lionel Messi uu dhayalsanayay xulka qaranka Sucuudiga, sidaas darteedna aanu dhiirranaantii iyo firfircoonidii badnayd u lahayn.
