Real Madrid ayuu waqtigu ku yar yahay si ay ugu qanciso laba ka mid ah xiddigaheeda inay sii joogaan Santiago Bernabeu, kuwaas oo xor u noqon doona inay si xor ah uga tagaan dhamaadka xilli ciyaareedka, halka ay haddana fasax buuxa u haystaan inay wada-xaajoodyo la furaan naadiyada danaynaya.
Ciyaartii ay xalay Real Madrid 2-0 kaga adkaatay Athletic Bilbao iyo guushii soo laabashada ee Villarreal ee usbuucii hore, waxa wacdaro ka dhigay Dani Ceballos iyo Marco Asensio, taas oo keentay in Carlo Ancelotti uu kusoo bilaabo kulankii xalay oo ay mar kale sameeyeen bandhig heersare aha.
Dani Ceballos oo ay muddo boos la’aani ku haysatay kooxdiisa, isla markaana kasoo laabtay waqti amaah ahaa oo uu kusoo qaatay kooxda horyaalka Premier League ee Arsenal ayaa uu hadda Carlo Ancelotti ku dedaalayaa inuu ku qanciyo inuu sii joogo Real Madrid isaga oo fursado fiican siinaya.
Luka Modric oo gaboobay iyo Toni Kroos oo illaa hadda ku adkaysanaya inuu ka fadhiisanayo ciyaaraha dhamaadka xilli ciyaareedkan socda ayay Real Madrid muddo ku tiirsanayd, waxaanay doonayaan inay ku dhegaan Dani Ceballos oo xalay caddeeyey in uu doonayo inuu sii joogo Bernabeu.
Dani Ceballos oo la weydiiyey mustaqbalkiisa ayaa yidhi: “Ma jirto koox ka weyn Real Madrid. Afar bilood ayaa ka hadhay qandaraaskayga, wax kastana waan u samaynayaa sidii aan halkan usii joogi lahaa si aan u muujiyo heerkayga ciyaareed.’
