Tababaraha kooxda kubadda cagta Manchester United ee Erik ten Hag ayaa xiddiga England ee Marcus Rashford barbar-dhigay laacibka reer France ee Kylian Mbappe, waxaana uu ku tilmaamay inuu ka mid yahay ciyaartoyda ugu wanaagsan dunida waqtigan.
Rashford oo dib ugu laabtay Manchester, kaddib markii uu xulkiisa England ka hadhay Koobka Adduunka isaga oo saddex gool dhaliyay ayaa waxa maalmo nasasho ah kaddib uu la midoobi doonaa ciyaartoyda kooxdiisa.
25 jirkan oo qandaraaskiisa Manchester United uu ku egyahay dhamaadka xilli ciyaareedkan socda ayaa hadal-hayn badan ay ka taagan tahay, inkasta oo Red Devils ay haysato 12 bilood oo dookh ah oo ay ku kordhin karto heshiiskiisa, sidii uu dhigayay qandaraaskii ugu dambeeyey ee uu saxeexay.
Kooxo ay ka mid tahay Paris Saint-Germain ayaa doonaya inay la saxeexdaan Marcus Rashford oo xor u noqonaya inuu la xaajoodo kooxda uu doono marka la gaadho bisha January, waxaana madaxweynaha PSG ee Nasser Al-Khelaifi uu toddobaadkii hore qirtay inuu doonayo inuu bisha January la hadlo laacibkan.
Si kastaba, tababare Erik ten Hag oo wax laga weydiiyey Marcus Rashford, ayaa yidhi: “Anigu waqtigan waxa aan u aqoonsanahay inuu yahay ciyaartoy weyn. Waxa aan rumaysanahay in marka uu Marcus ka ciyaarayo dhinaca midig in aanu jirin ciyaartoy ka wanaagsan oo dunida jooga.
“Waqtigan waxa jooga Mbappe, laakiin waa isku mid.”
Ugu dambayntii waxa uu Erik ten Hag sheegay inay ku dedaalayaan sidii ay Marcus Rashford uga saxeexi lahaayeen heshiis uu kusii joogo Old Trafford, sidoo kalena waxa uu muujiyey niyad-samaan maadaama ay haystaan 12 bilood oo dookh ah.
Manchester United ayaa waxa sidoo kale walwal ku haya heshiiska ay kula jirto Diogo Dalot oo ku eg dhamaadka xilli ciyaareedkan socda, balse sida Rashford oo kale ayaa waxay haystaan 12 bilood oo kale oo dookh ah oo Erik ten Hag xaqiijiyey inay dhaqan-gelin doonaan.
