Xiddiga khadka dhexe uga ciyaara xulka qaranka Faransiiska ee Aurelien Tchouameni ayaa rumaysan in Kylian Mbappe uu waqtigan ka wanaagsan yahay kabtanka xulka Argentina ee Lionel Messi ee ay Finalka Koobka Adduunka iskaga hor imanayaan Axadda.
Mbappe iyo Messi oo u wada ciyaara Paris Saint-Germain ayay xulalkooda France iyo Argentina iskugu soo baxeen finalka Koobka Adduunka ee garoonka Lusail Stadium loosii qurxiyey. Ka sokow koobka, waxay labadan ciyaartoy sidoo kale ku tartamayaan abaal-marinta kabta dahabka ah ee tartanka oo ay min shan gool ka dhaliyeen iyo abaal-marinta xiddiga tartanka.
Khubarada ciyaaraha ayaa intooda badan isku raacsan in Lionel Messi uu yahay ciyaarotyga ugu wanaagsnaa Koobka Adduunka ee ka socda Qatar, marka laga eego saamaynta uu ku lahaa xulkiisa, siiba ciyaartii ugu dambaysay ee Croatia ay 3-0 ku karbaasheen.
Laakiin Aurelien Tchouameni ayaa aragtidaas ka beddelan, waxaana uu rumaysan yahay in Mbappe uu yahay ciyaartoyga hadda ugu wanaagsan adduunyada oo uu xataa ka fiican yahay Lionel Messi, waxaanu yidhi: “Aniga aragtidayda, Kylian ayaa ah ciyaartoyga ugu wanaagsan.
“Aniga ahaan, Mbappe ayaa ugu fiican adduunyada, waxaanan doonayaa inuu horumarka sii wado ciyaarta xigta [finalka Koobka Adduunka].”
Inkasta oo uu Aurelien Tchouameni ku dooday in Mbappe uu yahay ciyaartoyga ugu wanaagsan dunida waqtigan, haddana saaxiibkiisa xulka France ee Antoine Griezmann ayaa qaba aragti taas ka duwan, waxaana uu sheegay in koox kasta oo uu Lionel Messi ku jiro inay ka duwan tahay naadiyada kale oo ay guuleysanayso, balse ay ku dedaali doonaan sidii ay iskaga celin lahaayeen.
