Frank Lampard ayaa loo ogolaaday inuu ka hadlo shirka jaraa’id ee Everton ee maanta xilli la sheegayo in la qoray warqaddiisa shaqo ka caydhinta kaddib ciyaartii ay Brighton 4-1 ku xasuuqday iyada oo marti ku ah Goodison Park.
Tababare Lampard oo Everton yimid bahdtamaha xilli ciyaareedkii hore iyaga oo casaanka ku jira, ayaa waxa uu ka badbaadiyey inay heerka labaad u dhacaan, hase yeeshee hadda ayay kooxdiisu mar kale qashay qaladaalse iyaga oo tobankii ciyaarood ee ugu dambeeyey hal mar oo kaliya guuleystay.
Everton oo Jimcaha berri la ciyaaraysa Manchester United ayay hore saxaafaddu u sheegeen in aanu laylin doonin oo ka hor ciyaartaas la eryi doono, hase yeeshee waxa muuqata in ciyaartan ay natiijadeedu go’aamin doonto mustaqbalkiisa Goodison Park.
Shirkii jaraa’id ee ka hor ciyaarta Everton, ayay saxaafaddu weydiisay mustaqbalkiisa iyo haddii uu u baahan yahay in la siiyo damaanad ah inuu ciyaarta Manchester United laylinayo kooxda, waxaanu ku jawaabay: ‘Anigu waligay ma aanan raadinin damaanad, mana raadin doono. Shaqadaydu waa kaliya in aan diiradda saaro shaqada aan gacanta ku hayo, hawl-maalmeedka iyo ciyaarba ciyaarta xigta. Xaqiiqadu waa sidaa. Anigu ma doonayo, umana baahni damaanad.
“Waxa aan halkan ku imid in aan ka shaqeeyo oo aan isku dayo in aan horumar sameeyo maalin kasta, naftayda u sameeyo horumar, kooxda horumariyo, sidaa daraadeed ayaanan damaanad u raadsanayn.”
