Xidhiidhka kubadda cagta Brazil oo muddo bil ah raadinayay tababare cusub markii uu Tite iska casilay xilka kaddib kulankii Croatia ee wareeggii siddeedda Koobka Adduunka ayaa waxay hadda xidhiidh la sameeyeen tababare aan wax shaqo ah haynin oo isaguna iska casilay xulkii uu watay dhamaadkii Koobka Adduunka.
Brazil ayaa lala xidhiidhiyey tababareyaal badan oo ay ku jiraan Jose Mourinho, Carlo Ancelotti iyo Pep Guardiola hase yeeshee waxa hadda soo baxaya in saddexdan tababare aanu midkoodna diyaar u ahayn inay ka tagaan kooxahooda AS Roma, Real Madrid iyo Manchester City.
Wargeyska Sport ee kasoo baxa Spain ayaa waxa uu sheegay, in diiradda Brazil uu soo galay tababaraha Fluminense ee Fernando Diniz oo loo yaqaano ‘Guardiola-ha Brazil’, laakiin taas waxa uu wali xidhiidhka Brazil doonayaa in ay tababre ka dhigtaan macallin reer Yurub ah si ay u beddelaan falsafadda ciyaareed ee xulkooda oo 20 sannadood ka hor ay ugu dambaysay inay ku guuleystaan Koobka Adduunka.
Sport ayaa intaa ku daray, in tababarihii xulka qaranka Spain ee Luis Enrique uu hadda yahay midka ugu cadcad shaqada xulka qaranka Brazil, waxaana dhinacyada u socda wada-hadallo meel fiican maraya oo ay suurtogal tahay in lasoo gabogabeeyo usbuucyada soo socda.
Enrique ayaa hore u sheegay inuu dib ugu soo laabanayo shaqada tababarenimada ee dhinaca kooxaha, laakiin uu wax weyn u arko inuu noqdo tababaraha xulka Brazil.
