Weeraryahankii hore ee xulka qaranka England iyo Arsenal ee Ian Wright ayaa magacaabay laba ciyaartoy oo ku jira xulka qaranka England oo ka khatar badan Kylian Mbappe, kuwaas oo ay tahay in Ingiriisku uu taxadar badan ka sameeyo wareegga siddeedda oo ay isku dhaceen.
Faransiiska oo soo garaacay Poland ayaa waxay wareegga siddeedda wada ciyaari doonaan xulka England oo iyaguna soo jiidhay Senegal, waxaana uu midkood u gudbi doonaa laba-dhamaadka halka midkooda kalena uu tartanka macasalaamayn doono.
Garoonka quruxda badan ee Al Bayt Stadium ayaa Sabtida ay taageereyaasha England iyo France iska xaadirin doonaan si ay u daawadaan kulankan adag, waxaana uu xulka England walaaca ugu badan ka qabaa weeraryahanka Kylian Mbappe oo shan gool dhaliyey afartii ciyaarood ee uu dheelay oo uu saddex ka mid ah kusoo bilowday, waxaana intii uu tartanku socday lagu tilmaamay laacibka ugu wanaagsan.
Ian Wright oo qiimaynayay ciyaartoyda xulka qaranka France ayaa waxa uu farriin u diray tababare Gareth Southgate iyo ciyaartoyda England waxaanu u sheegay in Kylian Mbappe laga khatar badan yahay oo ay joogaan laba ciyaartoy oo kale oo halis ah, sidaas darteedna aanay isaga uun diirradda saarin.
Wright oo kaa hadalyay telefishanka ITV, ayaa waxa uu ku dooday in Antoine Griezmann iyo Ousmane Dembele ay ka khatar badan yihiin Kylian Mbappe, waxaanu yidhi: “Ilama aha inaad iska indho tiri karaysaan Griezmann. Dabcan way caddahay in aydaan sidoo kale iska indho tiri karayn Mbappe, laakiin Griezmann waa midka wax walba isku tola. Ousmane Dembele ayaa sidoo kale ah.
‘Waa in aad joojisaan Griezmann, waana in aad la socotaan Ousmane Dembele sababtoo ah way adag tahay in la joojiyo Dembele.”
