Tababaraha kooxda kubadda cagta Barcelona ee Xavi Heranndez ayaa ka walaacsan xaaladda xiddig ka tirsan naadigiisa oo uu ka baqayo inuu si xor ah uga tago marka uu dhamaado qandaraaskiisu, mana aha kabtanka shandaddiisa xidh-xidhay eer Sergio Busquets.
Barcelona oo xagaagii €150 milyan oo Euro ku kharash garaysay saxeexyada Rober Lewandowski, Raphinha iyo Jules Kounde ayaa sidoo kalena qaab xor ah kula soo wareegtay Frenkie de Kessie, Marcos Alonso, Andreas Christensen iyo Hector Bellerin, hase yeeshee waxa ay la dhibatoonayaan sidii ay ugu qancin lahaayeen dhawr ciyaartoy in ay heshiisyo cusub saxeexaan.
Xavi ayaa muddooyinkii dambe si shaqsi ah iskugu dayay inuu ku qanciyo Busquets in uu sii joogo Camp Nou oo illaa haddana diiddan, hase yeeshee xiddiga kale ee walaaca ku haya waqtigan ayaa ah kubbad-sameeyaha reer Netherlands ee Frenkie de Jong oo hore iskaga diiday inuu qandaraas cusub oo mushahar dhimis ah saxeexo, sidoo kalena diiday in la iibiyo.
Wargeyska aadka looga akhristo Spain ee Relevo ayaa sheegay in Xavi Hernandez uu culays badan ku hayao xiddiga reer Nehterlands ee heshiis diidka iyo iibinta intaba iska diiday ee De Jong, waxaana uu ka baqayaa in laacibkani uu si xor ah uga tago Camp Nou.
De Jong oo sannadkii 2019 ay Barcelona €75 milyan oo Gini kaga soo iibsatay Ajax ayaa uu aad u xumaaday xidhiidhka ka dhexeeya maamulka Barcelona maarkii ay isku dayeen inay ku qasbaan inuu mushahar dhimis sameeyo amaba ogolaado in la iibiyo.
Inkasta oo qandaraaskiisu uu soconayo illaa xagaaga sannadka 2026, haddana jariidadda Relevo waxay sheegtay in Xavi uu rumaysan yahay in uu 25 jirkani si xor ah ku tegi doono marka la gaadho waqtigaas, taasina walaac shaqsi ah ku hayso.
