Wareeggii siddeedda Koobka Adduunka waxa lagu garaacay waddamadii ugu waaweynaa ee loo saadaalinayay inay Koobka ku guuleysanayaan, sida England, Netherlands, Portugal iyo Brazil, laakiin waxa khilaaf iyo hadal-hayn badan oo muddo soo taagnayd ay u raacday Portugal, taas oo sababteeda uu lahaa Cristiano Ronaldo.
Xiddigo waaweyn oo xulalkan ah ayaa macasalaamaynaya koobka adduunka oo aan mar dambe ciyaari doonin, waxaana ka mid ah Cristiano Ronaldo oo 37 jir ah, isla markaana aanu cimrigiisa ciyaareed ku simayn koobka afar sannadood kaddib la qaban doono. Sidoo kale, Thiago Silva, Dani Alves iyo xiddigo kale ayaa iyaguna tiirin doona kabaha kubadda ka hor inta aan la gaadhin Koobka Adduunka 2026.
Halyeygii xulka qaranka Portugal ee Luis Figo ayaa ka hadlay xurgufta ka dhax jirtay xulkiisa, waxaana uu si toos ah u tilmaamay shaqsiga iska leh eedda guul-darradii ay Morocco ugu xambaarisay siddeed-dhamaadka ee ay koobka kaga hadheen.
Portugal oo wareeggii 16-ka guul weyn oo 6-1 ah kasoo gaadhay Switzerland ayaa waxay ku hadhay gool mdi ah oo Morcco ay ka dhalisay, waxaana labadan ciyaaroodba kaydka kusoo bilowday Ronaldo oo ay isku dhaceen tababare Fernandeso Santos.
Figo oo u warramayay wargeyska Sport ayaa la weydiiyey sida uu dalkiisu uga hadhay Koobka Adduunka iyo qofka eedda iska lahaa, waxaana uu ku jawaabay: “Koobka Adduunka kuma guuleysan kartid iyadoo Cristiano uu kaydka fadhiyo. In Cristiano Ronaldo la fadhiisiyo qalad ayay ahayd. Masuuliyadda guul-darrada waxa iska leh Fernando Santos.”
