Tababarihii hore ee Barcelona iyo xulka qaranka Spain ee Luis Enrique ayaa shuruudo ku xidhay inuu Atletico Madrid ka beddelo Diego Simeone oo la sheegay inuu ka tegi doono kooxdiisa dhamaadka xilli ciyaareedkan.
Enrique oo bishii December iska casilay xilka Spain markii ay kasoo hadheen Koobka Adduunka, ayaa waxa lala xidhiidhinayaa shaqooyin badan, iyadoo Arbacadiina uu tababare Diego Simeone caddeeyey in aanay cidina ka dalbanin inuu ka tago Atletico Madrid, laakiin wararka la helayo ayaa sheegaya in ay suurtogal tahay in aanu sii joogin haddii xilli ciyaareedkani u noqdo mid aanay wax koob ah ku guuleysanin.
Maamulka Atletico Madrid ayaa la sheegay in ay aad u doonayaan in Luis Enrique uu noqdo tababaraheeda cusub, iyaga oo qorshahoodu yahay inay isbeddel ciyaareed sameeyaan si ay horyaalka ugu tartami karaan.
Sida uu qoray wargeyska Fichajes, Enrique ayaa saddex shuruudood ku xidhay inuu noqdo tababaraha Atletico Madrid, waxaanay dhamaantood yihiin in ciyaartooyo cusub lagu soo kordhiyo naadiga.
Enrique ayaa waxa uu ka dalbanayaa Atletico inay Wanda Metropolitano keenaan difaac dhexe oo horumar ku samayn kara qaab-ciyaareedka afarta dambe ee hadda dagaalka kaliya shaqadoodu tahay, hal-abuure khad dhexe oo sidoo kale kubbad-buburiye ah, iyo shuruudda ugu dambaysa oo ah weeraryahan orod badan oo ku fiican dhalinta goolasha.
Waxa la sheegayaa in uu jeclaan lahaa in Atletico ay la saxeexato Mikel Oyarzabal ama Dani Olmo, sidoo kalena Ferran Torres oo ay isku cindan yihiin inanta uu dhalay ayaa isaguna ku jira ciyaartoyda uu danaynayo.
