Tababarihii xulka qaranka Spain ee toddobaadkii hore iscasilay ee Luis Enrique ayaa shaaciyey xulka uu la doonayo inuu ku guuleysto Koobka Adduunka mar haddii uu dalkii uu hoggaaminayay ee Spain ka hadhay.
Luis Enrique ayaa waxa xulkiisa Spain ay ku hadheen wareeggii 16ka, waxaana rikoodheyaal ku garaacday Morocco oo wareeggii xigay ee siddeeddana ku reebay Portugal, isla markaana Arbacada la ballansan Faransiiska oo ay semi-finalka isku haleelayaan.
Enrique ayaa waxa uu caawa daawan doonaa kulanka adag ee Argentina iyo Croatia, waxaana uu qalbigiisu raacsan yahay ciyaartoydii uu hore tababaraha ugu soo noqday, waana Lionel Messi iyo xulkiisa Argentina oo uu mar kale ku celiyey inuu la doonayo inay ku guuleystaan Koobka Adduunka.
Enrique oo ka hadlaayay bartiisa Twitch ayaa waxa uu sheegay in xiddiga Argentina ee uu hore usoo tababaray uu la doonayo Koobka Adduunka, maadaama dalkiisa Spain uu ka baxay tartanka, waxaanu yidhi: “Waxa aan jeclaan lahaa in Leo Messi uu ku guuleysto Koobka Adduunka, sababtoo ah qiimaha uu ku leeyahay [Messi] kubadda cagta.”
Ka hor intii aanu bilaabmin Koobka Adduunka ayaa waxa la weydiiyey Luis Enrique dalka uu jeclaan lahaa in uu ku guuleysto Koobka Adduunka, waxaana uu waqtigaas ku jawaabay: “Haddii aanay Spain ku guuleysan, waxa aan jeclaan lahaa in Argentina ku guuleysato sababtoo ah Messi. Caddaalad-darro ayay noqon doontaa haddii Messi uu ka fadhiisto ciyaraha isaga oo aan ku guuleysanin Koobka Adduunka.”
