Xiddiga Liverpool ee Luis Diaz ayaa maanta oo Sabti qalliin lagaga samaynayaa jilibka oo uu ka dhaawacmay isaga oo tababarka la samaynaya kooxdiisa oo uu muddo saddex bilood ah kaga maqnaa dhaawac uu hadda uun kasoo kabtay oo kasoo gaadhay ciyaartii horyaalka Premier League ee Arsenal.
Laacibka reer COlombia ayaa taam kasoo noqday dhaawac jilibka ahaa oo bishii October soo gaadhay, waxaana uu tababarka kala bilaabay ciyaartoyda kooxdiisa magaalada Dubai oo ay ku sugan yihiin, laakiin jilibka ayaa uu haddana ka dareemay xanuun.
Diaz oo ay ahayd inuu ciyaaaro kulanka saaxiibtinimo ee Lyon ee maanta, ayaa Khamiistii ka tegay garoonka tababarka, waxaana sawirro laga qaaday ay muujiyeen in uu u baahan yahay in qalliin lagu sameeyo, si meesha looga saaro dhibaatada jilibka ee kusoo noqnoqotay.
Wariyaha ciyaaraha reer Colombia ee Pipe Sierra ayaa xaqiijiyey, in Luis Diaz maanta lagu samaynayo qalliin, waxaana uu yidhi: “Luis Diaz waxa uu geli doonaa qalliin berri [maanta] si uu uga soo kabto dhaawac jilibka ah. Liverpool waxay rajaynaysaa in uu laacibka reer Colombia ciyaraha kusoo laaban doono bisha March.”
Qalliink uu gelayo Luis Diaz ayaa waxay ka dhigan tahay in uu ka maqnaanayo inta badan xilli ciyaareedka oo aanu qayb ka noqonayn jadwalka cidhiidhiga ah ee bilaha January, February iyo xataa March oo aan la hubin waqtiga uu kasoo noqon doono.
Marka la isku-geeyo waqtiga uu dhaawacyada ku seegayo xilli ciyaareedka, waxay noqonaysaa lix bilood, waana inta badan xilli-ciyaareedkan.
