Memphis Depay ayaa ceeb weyn dareemay shirkii jaraa’id ee maanta ka dib markii Louis van Gaal uu u jawaabay Angel di Maria islamarkaana uu jawaab la yaab leh bixiyay.
Ka hor kulanka wareega sideed dhamaadka Koobka Adduunka ee Netherlands iyo Argentina, waxaa hadalo weerar ah ay ka soo yeereen Angel di Maria kaasoo ku tilmaamay macalinkiisii hore ee Man United Van Gaal tababarihii ugu xumaa ee uu abid ka hoos ciyaaro.
Isagoo u hadlayay warbaahinta Argentina ee TYC Sports, xiddiga reer Argentina oo ka hoos ciyaaray Van Gaal markii ay wada joogeen Old Trafford ayaa yiri:
Dhibaatadeydii Manchester waxay aheyd tababaraha” ayuu yiri Di Maria.
“Van Gaal wuxuu ahaa tababarihii ugu xumaa ee waayaheyga ciyaareed. Marka aan gool dhaliyo ama caawin sameeyo, maalinta ku xigta wuxuu i tusayaa muuqaal aan baas qalday.
“Maalintii ugu horeysayba wuu i necbaa, ma uusan jeclaan ciyaartoyda isaga ka muhiimsan.”
Van Gaal ayaa shirkiisii jaraa’id ee maanta lagu weydiiyay hadalada ka soo yeeray Angel di Maria. Jawaabta Van Gaal uu ka bixiyay waxay sidoo kale ceeb weyn iyo yaxyax ku noqotay Memphis Depay oo garab fadhiyay shirka jaraa’id.
“Di Maria ma wuxuu iigu yeeray tababarihii ugu xumaa ee uu abid ka hoos ciyaaro? Waa mid ka mid ciyaartooy tiro yar oo fekradaas aaminsan. Aad ayaan uga xumahay inuu sidaas aaminsan yahay, waana ka murugoonayaa inuu sidaas yiri.” ayuu yiri Van Gaal.
“Memphis Depay isagaba si la mid ah ayaan u la dhaqmay markii aan Manchester joognay, haadana afka ayaa iska dhunkanaa. Dhunkashada afka isaga ma jecla laakiin waa wax iska caadi ah.”
Jawaabta Van Gaal waxay ceeb iyo yaxyax ku riday Memphis Depay oo wajiga dabooshay islamarkaana ay lama filaan ku aheyd wixii ka soo yeeray tababarihiisa.
