Liverpool ayaa guul ay aad ugu baahnayd kasoo gaadhay Aston Villa oo ay 3-1 kusoo garaacday, waxaanay kusii negaadeen kaalintooda lixaad inkasta oo ay shan dhibcood usoo jirsadeen Tottenham oo kaalinta afraad fadhida.
Mohamed Salah, Virgil van Dijk iyo Bajcetic ayaa dhaliyey goolasha liverpool, waxaanay yeesheen 25 dhibcood, halka Tottenham oo afraad ku jirtaana ay leedahay 30 dhibcood, halka Man United oo shanaad ku jirta ay dhibic kaliya ka dambeeyaan inkasta oo Red Devils ay Salaasada la ciyaarayso Nottingham Forest.
Lixdii rikoodh ee ciyaarta
- Liverpool ayaa saddex ciyaarood oo xidhiidh ah oo Premier League ah guuleysatay markii ugu horreysay tan iyo dhamaadka xilli-ciyaareedkii hore ee 2021-22. Xilli ciyaareedkan ma aanay dhicin in marnaba ay saddex kulan oo isku xiga oo horyaalka ah guuleysteen, balse caawa ayay taas xaqiijiyeen.
- Difaaca Liverpool ee Andrew Robertson ayaa sameeyey caawintiisii 54aad ee horyaalka Premier League, waxaanu sidaas ku noqday difaacii ugu caawinta badnaa taariikhda horyaalka Premier League.
- Mohamed Salah ayaa goolkiisii 55aad ee horyaalka Premier League ah ku dhaliyey meel ka baxsan Anfield. Waxa uu sidaa ku barbarreeyey rikoodhkii Michael Owen oo ahaa laacibka goolasha ugu badan martida ugu dhaliyey Liverpool.
- Xiddiga Aston Villa ee Ollie Watkins ayaa dhaliyey goolkiisii shanaad ee Premier League ah ka dhaliyey Liverpool, waana kooxda ugu badan ee uu goolasha ka dhaliyey.
- Stefan Bajcetic oo ay da’diisu tahay 18 sannadood iyo 65 maalmood ayaa noqday ciyaartoygii saddexaad ee ugu da’da yaraa ee Liverpool u dhaliya gool horyaalka Premier League ah. Waxa kaliya oo goolal dhaliyey iyaga oo ka da’yaraa Michael Owen iyo Raheem Sterling.
- Ben Doak ayaa kursiga kaydka kasoo kacay oo Liverpool u ciyaaray kulankiisii koowaad ee horyaalka Premier League ah, waxaanay da’diisu jirtaa 17 sannadood iyo 45 maalmood. Waxa uu sidaa ku noqday ciyaartoygii ugu da’da yaraa ee reer Scotland ah ee safta kulan Premier League ah.
Xiddigii garoonka
Mohamed Salah oo dhaliyey goolka koowaad, midka labaadna caawiye ka noqday waxa uu sidoo kale helay fursado badan oo uu goolal u beddeli karayay. Saamayntiisa ciyaarta iyo goolasha uu dhaliyey ayaa ka dhigtay xiddigii ugu fiicnaa isku-darka ciyaartoyda labada kooxood. Waxa uu helay qiimayn darajadeedu ahayd 8, waxaanay isku mid ahaayeen Van Dijk iyo Robertson hase yeeshee waxa uu xiddignimada garoonka kaga qaaday goolka iyo caawinta uu isku darsaday.
Qiimayntii ciyaartoyda labada kooxood
Aston Villa: Olsen (7), Young (7), Konsa (6), Mings (6), Digne (7), Luiz (7), Kamara (7), McGinn (7), Buendia (7), Watkins (7), Bailey (6).
Beddelka: Ings (n/a), Coutinho (n/a), Dendoncker (n/a).
Liverpool: Alisson (7), Alexander-Arnold (7), Matip (6), Van Dijk (8), Robertson (8), Fabinho (7), Thiago (6), Henderson (7), Oxlade-Chamberlain (6), Nunez (7), Salah (8).
Beddelka: Elliott (6), Keita (6), Gomez (6), Bajcetic (8), Doak (n/a).
