Ciyaartii barbarraha kusoo dhamaatay ee Netherlands iyo Ecuador waxay xaalad adag gelisay Group-ka A ee Koobka Adduunka, waxaana isku dheggan saddex dal oo dhamaantood rajadoodu ku xidhan tahay ciyaarta ugu dambaysa, hase yeeshee martigeliyeyaasha ayaa sagxadda tegay oo macasalaameeyey tartanka.
Holland ayaa gool uu u dhaliyey Cody Gakpo la hormartay ciyaarta, waxaase ka daba yimid Enner Valencia oo goolka barbarraha oo uu taariikh cajiib ah ku sameeyey u dhaliyey Ecuador.
Weeraryahankan hore ee West Ham, ayaa waxa uu noqday ciyaartoyga ugu goolasha badan Koobka Adduunka ee ka socda Qatar, waxa kale oo uu sameeyey taariikh layaableh oo aanay jirin cid kale oo la wadaagta ee ku sugan waddanka Qatar.
Enner Valencia oo ay da’diisu tahay 33 jir ayaa waxa taariikhda cajiibka ah ee loo diiwaangeliyey ay tahay inuu dhaliyey lixdii gool ee ugu dambeeyey ee dalkiisa Ecuador uu ka dhaliyo Koobka Adduunka.
Sannadkii 2014 ayuu Koobkii Adduunka ee lagu qabtay Brazil ka dhaliyey saddex gool inkasta oo ay wareeggii koowaad ku hadheen, haddana waxa labadii ciyaarood ee Qatar iyo Holland ee uu dheelay uu ku dhaliyey saddex gool, taas oo ka dhigan in dhamaan lixdii gool ee ugu dambeeyey ee dalkiisu uu ka dhaliyey Koobka Adduunka uu saxeexay Enner Valencia.
Sannadkii 2018 ayaanu xulka qaranka Ecuador usoo bixin Koobka Adduunka, waxaana uu Valencia ka maqnaa fagaaraha uu hadda ka yahay ciyaartoyga ugu goolasha badan.
Kaddib markii uu taariikhdan sameeyey, Enner Valencia oo ah ciyaartoyga hoggaaminaya kabta dahabka ah ee Koobka Adduunka ee Qatar, waxa soo gaadhay dhaawac sababay in garoonka lagaga dhax qaado naxash, waxaana la filayaa in 24ka saacadood ee soo socda ay dhakhaatiirtu war buuxa kasoo saaraan xaaladda dhaawaciisa.
