Kulankii labaad ee Manchester Derby ee horyaalka Premier League ee xilli-ciyaareedkan ayaa Sabtida qabsoomaya, waxaana la sugayaa in ay dhacaan waxyaabo waaweyn sidii horraantii xilli ciyaareedkan oo kale, markaas oo ay Manchester City geysatay xasuuq.
United ayaa garoonkeeda Old Trafford kusoo dhoweyn doonta Man City, waxaana uu Erik ten Hag isku diyaarinayaa aargoosi, laakiin Pep Guardiola ayaa isaguna samayn doona rrikoodh taariikhi ah haddii ay kooxdiisu hesho saddexda dhibcood.
Citizens ayaa si dhab ah loogu diiwaangelin doonaa inay tahay kooxda ka dhalisa magaalada Manchester, iyada oo meesha ka saari doonta wax kasta oo hore uga diiwaangashanaa isku-dhacooda. Ka sokow taariikhda ay samaynayaan, waxa kale oo ay barbarrayn doonaan rikoodho in ka badan 67 sannadood soo taxnaa.
Manchester City ayaa haddii ay guuleysato ciyaartan, waxay u noqon doontaa xilli-ciyaareedkii lixaad ee ay labadii kulanba garaacdo Manchester United, taas loogu diiwaangelin doono inay tahay kooxdii ugu weynayd ee ay City sidaa u bahdisho taariikhdeeda.
Kulankii sagaalka gool la iska dhaliyey ee ay Man City 6-3 kusoo xasuuqday Manchester United ee Etihad Stadium ee horraantii xilli ciyaareedka, waxa min saddex gool saxeexay Phil Foden iyo Erling Haaland. Haddii ay laba gool oo kale dhaliyaan labadoodu, waxay barbarrayn doonaan rikoodh taariikhi ah iyaga oo noqon doona ciyaartoygii goolasha ugu badan ka dhaliyey Man United hal xilli-ciyaareed gudihii tan iyo sannadkii 1955kii.
Pep Guardiola ayay isagana u tahay maalin taariikhi ah, waxaana u buuxsamaya 500 ciyaarood oo uu tababare yahay. Waxa uu doonayaa inuu ugu dabbaal-dego guul uu ka gaadho Manchester United.
