Kooxda kubadda cagta Liverpool ayaa hoggaaminaysa tartanka loogu jiro xiddigii khadka dhexe ee Arsenal ee Yunus Musah oo haddana u dheela Valencia, kaas oo uu tababare Jurgen Klopp dalbaday in loogu keeno Anfield, si uu qayb uga noqdo xalka mushkiladda ku habsatay kooxdiisa xilli ciyaareedkan.
Musah ayaa kasoo baxay kulliyadda da’yarta Arsenal balse waxa uu ka tegay sannadkii 2019 oo uu u guuray Spain isaga oo ku biiray Valencia oo markiiba usoo dallacsiisay kooxda koowaad iyadoo ay da’diisu tahay 17 jir, waxaana uu goolkiisii koowaad u dhaliyey intii aanu u dabbaal-degin da’da 18 jirka.
Xiddigan khadka dhexe oo ay hadda da’adiisu tahay 20 jir, ayaa ka mid ahaa xulka qaranka Maraykanka ee ka qayb-gelay Koobkii Adduunka ee Qatar, waxaana uu kusoo bilowday dhamaan afartii ciyaarood ee ay dheeleen oo ay ku jirto kulankii England ay barbarraha goolal la’aanta ah galeen.
Jurgen Klopp ayaa la sheegay inuu la dhacsan yahay Yunus Musah oo ka sokow khadka dhexe ka ciyaari kara garbaha weerarka, waxaana uu qorshaha tababaraha reer Germany yahay in uu ka dhigto saxeexa labaad ee bisha January.
Laacibkan oo toddoba sannadood kusoo qaatay Arsenal, ayaa waxa sidoo kale doonaya inuu dib usoo ceshado Mikel Arteta oo si weyn ula dhacsan qaab-ciyaareedka uu laacibkani muujinayo.
Sida uu qoray wargeyska Fichajes ee kasoo baxa Spain, Jurgen Klopp ayaa bartilmaameed ka dhigtay Yunus Musah oo uu u arko ciyaartoy mustaqbalka iyo haddaba kooxdiisa anfcaya.
Valencia ayaa la sheegay in ay ku iibinayso Yunus Musah lacag gaadhaysa £18 milyan oo Gini.
