Kooxaha horyaalka Premier League ee Liverpool iyo Arsenal ayaa ku dagaallamaya xiddig da’yar oo reer Spain ah oo lagu tilmaamo inuu qaab-ciyaareedkiisa oo kale leeyahay kubbad-sameeyaha Barcelona ee Pedri, kaas oo ay Jurgen Klopp iyo Mikel Arteta uga gacan haadinayaan naadiyadooda.
Ciyaartoygan oo lagu naanayso Pedri-ga cusub, ayaa u ciyaara kooxda reer Spain ee Las Palmas oo uu sannadkii hore kooxdeeda koowaad usoo dallacay, waxaana uu u saftay 22 ciyaarood oo dhamaan tartamada ah oo uu u sameeyey shan caawimood.
Alberto Moleiro,oo 19 jir ah ayaa waxa indhaha kooxaha waaweyn aad usoo jiitay bandhigga uu ka sameeyey Canary Islands, waxaana ay qaab ciyaareedka isku mid ka yihiin da’yarka Barcelona ee Pedri, waxaana labadan ciyaartoy marar dhawr ah isbarbar-dhig ku sameeyey saxaafadda Spain.
Sida uu qoray wargeyska Daily Mail ee kasoo baxa Ingiriiska, Liverpool iyo Arsenal ayaa ku tartamaya saxeexa Alberto Moleiro, balse kalidood ma aha, waxaana iyaguna doonaya naadiyada Aston Villa iyo Real Madrid.
Liverpool oo ku jirta xilli ciyaareed murugo leh oo Isniintii ay Brentford 3-1 kusoo karbaashtay, isla markaana 16 dhibcood ka dambaysa Arsenal oo hoggaanka haysa, ayaa waxay doonaysaa inay khadkeeda dhexe ee liigaya kusoo kordhiso Alberto Moleiro suuqa bishan January.
Alberto Moleiro ayaa qandaraaska uu kula jiro Las Palmas waxa uu dhacayaa sannadka 2016, hase yeeshee naadigaas oo ay saamaysay dhaqaal-xumada ku habsatay dunida ayaa ogolaanaysa inay iibiso.
Moleiro ayaa la filayaa inuu kusoo bilowdo ciyaarta Sabtida maanta ay Las Palmas ku martigelin doonto Racing de Santander oo ay horyaalka heerka labaad ee Spain ka wada dheelaan, waxaana haddii ay guuleystaan ay afar dhibcood oo nadiif ah ka sarrayn doonaan Eibar oo kaalinta labaad fadhida.
