Kabtanka xulka Croatia ee Luka Modric ayaa qaab lama filaan ah uga hadlay dhigiisa Argentina ee Lionel Messi kaddib kulankii xalay labada dal ku dhex maray afar dhammaadka koobka aduunka,
Xulka La Albiceleste ayaa guul weyn oo 3-0 ah gaadhay kulankaas kaddib gool ka yimid Messi iyo laba gool oo uu Julian Alvarez shabaqa la gaadhay.
Modric ayaa ugu horreynba eedaymo u jeediyay garsoorihii kulankaas ee Daniel Orsato oo uu sheegay mid u diiday koorne muhiim ahaa isla markaana ku dhigay rigoore uusan u arkayn mid sax ah.
“May ahayn inay sidan noqoto, waa inaanu soo kabano oo isku dayno inaanu guuleysano kulanka loogu tartamayo kaalinta saddexaad, waanu murugaysanahay, Final kale ayaanu doonaynay, waa inaanu u hambalyayno Argentina” ayuu yidhi Modric.
“Waanu fiicnayn anagoo kulanka xakamaynayna kaddib koornahan uusan garsooruhu nasiin iyo rigooraha oo aan aniga rigoore ila ahayn ayaa waxkasta bedelay, xiddiga Argentina (Alvarez) kubadda ayuu laagay kaddib wuxuu ku dhacay goolhayahayaga, isaga ayuu jiidhay, ma rumaysan karo inuu rigoore dhigay”.
Ugu dambayn, Luka Modric ayaa qirtay in Lionel Messi yahay midka ugu fiican taariikhda kubadda cagta isla markaana u rajaynayo ku guuleysiga koobka aduunka.
“Waxaan rajaynayaa in Lionel Messi ku guuleysto koobka aduunka, isagu waa ciyaartoyga ugu fiican taariikhda wuuna u qalmaa”.
