Lionel Messi waxa intii uu garoomada ku jiray uu dhibbane u ahaa barbar-dhig joogto ah oo tallaabada uu qaadaba lagu masaalayey ama lagu barbar-dhigayay Diego Maradona, xaaladduna waxa ay isbeddeshaa marka uu Koobka Adduunka tago.
Xiddiga toddobada jeer ku guuleystay abaal-marinta Ballon d’Or waxa loo aqoonsan yahay inuu yahay ciyaartoyga goolasha ugu badan dhaliyey sannad gudihii horyaallada waaweyn ee Yurub, sidoo kalena waxa uu aad uga badan yahay Diego Maradona dhinaca gool-dhalinta iyo abaal-marinnnada shaqsiga ah, balse mucjisooyinkii uu Maradona ka dhigay Koobka Adduunka ayaa dabar ku ah Lionel Messi.
Toddobaadkii hore waxay Argentina soo gabogabaysay 36 ciyaarood oo xidhiidh ahaa oo aan laga badin, waxaana si xun u bahdilay Sucuudiga oo 2-1 ku garaacay iyadoo Lionel Messi iyo xiddigaha waaweyn ee Argentina uu shaki galay awooddooda ay ugu guuleysan karayaan Koobka Adduunka ee aadka loogu saadaalinayo.
Midkee ku wanaagsanaa Koobka Adduunka: Messi & Maradona?
Diego Maradona kama go’i doono quluubta reer Argentina, waxaana xataa isaga oo geeriyooday uu u yahay halyey aanay jirin cid la mid ah oo soo martay. Sannadkii 1986kii ayuu u qaaday Koobka Adduunka, isaga oo waliba sameeyey mucjisooyin waaweyn, sida goolkii uu gacanta kaga dhaliyey Ingiriiska iyo goysmooyinkii uu ku tiriyey inta badan ciyaartoyda.
Sannadkii 2014 ayuu Lionel Messi dalkiisa keenay finalka Koobka Adduunka, waxaana ciyaartii ugu dambaysay ee finalka ka adkaaday Jarmalka oo gool madi ah ka dhaliyey. 2014 ayaa lagu tilmaamaa in uu yahay sannadkii uu ugu fiicnaa Lionel Messi, marka laga eego tamartiisii, tayada iyo bandhigyadii uu ka sameeyey garoomada, iyo waliba heerka uu xulkiisa lasoo gaadhay.
Xog muhiim ah oo ku saabsan rikoodhka Koobka Adduunka ee Messi & Maradona
Kulamada ay ciyaareen: Maradona 7-7 Messi
Goolasha: Maradona 5-4 Messi
Inta jeer ee ay goolka toogteen: Maradona 1.9-1.1 Messi
Fursadaha waaweyn ee ay lumiyeen: Maradona 0-0 Messi
Fursadaha goolasha: Maradona 17%-17% Messi
Goolasha bannaanka ay ka dhaliyeen: Messi 3-0 Maradona
Caawinta: Maradona 5-1 Messi
Baasaska muhiimka ahaa ee ay ciyaar walba bixiyeen: Maradona 3.9-3.3 Messi
Saxsanaanta kubbad-dhiibistooda: Maradona 80%-80% Messi
Saxsanaanta kubbadaha dhaadheer ee ay tuureen: Messi 79%-71% Maradona
Saxsanaanta kubbada karooska ah: Messi 29%-24% Maradona
Goysmooyinkaa guuleystay: Messi 63%-59% Maradona
Qaladka lagu galay ciyaar walba: Maradona 7.6-2.6 Messi
Kubbadaha ay khasaariyeen: Messi 20.9-21.7 Maradona
Taakalada: Maradona 1.9-1.6 Messi
