Xiddiga reer Argentina ee Lionel Messi ayaa loo sheegay in loo dooran doono Madaxweynaha waddanka Argentina kaddib Koobka Adduunka ee ka socda waddanka Qatar, laakiin waxa ku xidhan hal shuruud oo ah inuu dalkiisa u qaado Koobka.
Argentina oo guul-darro 2-1 ah oo ay kala kulmeen Sucuudiga ku bilowday Koobka Adduunka ayaa labadii kulan ee xigay ee group-yada guuleystay, kaddibna waxay wareeggii 16ka kusoo garaaceen Australia.
Lionel Messi oo laba gool dhaliyey, sidoo kalena hal caawin sameeyey afar ciyaarood oo Koobka Adduunka ee Qatar ah oo uu saftay, ayaa waxa hadda ay isaga iyo xiddigaha dalkiisu isku diyaarinayaan Holland oo ay wareegga siddeedda isku dhaceen.
Argentina oo sannadkii 1986kii ku guuleysatay Koobka Adduunka ayaa u dagaallamaysa in markeedii labaad ay qaaddo sannadkan, waxaana hddii ay sidaasi dhacdo ay taariikh u noqon doontaa Lionel Messi oo loo dooran doono Madaxweynaha Argentina, sida uu sheegay Madaxweynihii hore ee Argentina ee Mauricio Macri.
Mauricio Macri oo waraysi siiyey wargeyska Marca ayaa waxa uu sheegay, in Lionel Messi laga dhigi doono Madaxweynaha Argentina haddii uu dalkiisa u qaado Koobka Adduunka, waxaanau yidhi: “Dhamaantayo waxa aanu u dooran doonaa Madaxweyne. Waxa ugu muhiimsan in kooxdu faraxsan tahay, cimilladu wanaagsan tahay, waxaana aanu uga mahad-celinaynaa Scaloni. Shaqaalaha tababarku waa dad nadiif ah oo caafimaad qaba, taageereyaasha ugu wanaagsan Koobka Adduunkuna waa kuwa Argentina.”
Madaxweyne Mauricio Macri oo la weydiiyey haddii dalkiisu uu ka mid yahay waddamada ugu cadcad ku guuleysiga Koobka Adduunka, waxa uu ku jawaabay: “Mar walba waxa aan sheegaa in aanu ku jirno shanta ama lixda xul ee ugu wanaagsan. Wax walba way isbeddeli karaan, laakiin maanta waxa aad aragtaan in France iyo Brazil ay woxoogaa naga sarreeyaan, balse wax walba waa nasiiib, Argentina na wali ma helin nasiib.”
