Tababaraha xulka qaranka Argentina ee Lionel Scaloni ayaa walwalsan maalmo ka hor finalka Koobka Adduunka ee ay la ciyaari doonaan Faransiiska iyo Morocco midkooda caawa soo gudba, sababtoo ah waxa uu xalay dhaawac soo gaadhay xiddiga xulkiisa ee Lionel Messi.
Kabtanka xulka Argentina oo xalay soo bandhig mid ka mid ah ciyaarihiisii ugu sarreeyey, isla markaana garoonka Lusail Stadium ku silciyey ciyaartoyda Croatia oo uu rikoodhe ka dhaliyey, sidoo kalena uu caawiyey goolkii labaad ee Julian Alvarez uu dhaliyey.
35 jirkan ayaa ciyaarta dhamaystay isaga oo faraxsan, laakiin waxa jiray xaalado walwal leh oo laacibkan soo maray dhamaadkii ciyaarta, kaddib markii la arkay isaga oo muruqa is-haya kaddib markii uu sida xun u bahdilay Josko Gvardiol oo uu kubbad dhinaca midig ay isku heleen uu si fudud ula soo dhaafaya ee uu goolka hortiisa u dhigay Julian Alvarez daqiiqaddii 69aad, taas oo ahayd goolkii saddexaad ee Argentina ka dhaliso Croatia.
Lionel Scaloni ayaan ka hadal dhaawaca soo gaadhay Lionel Messi oo muruqa ah, hase yeeshee waxay warbaahinta Ingiriiska oo adeegsanaya sawir uu muruqa bowdada is-hayo Messi ay ku sheegeen in uu dhaawacan yahay.
Ciyaarta kaddib ayaa Messi la weydiiyey sida uu xaalkiisu yahay maadaama uu muruqa is-hayay, waxaana uu ku jawaabay: “Run ahaantii waxa aan dareemayaa in aan fiicanahay, waxa aan dareemayaa xoogganaan iyo in aan diyaar u ahay in aan ciyaaro kulan walba.
“Ma ahayn ciyaar fudud sababtoo ah waxa aanu nimid anaga oo daallan, balse waxa aanu ahayn koox adag, waxaananu dheelnay ciyaar xooggan. In badan ayaan faraxsanahay, waxa aan ku dareemayaa Koobka Adduunka farxad iyo in aan awooday in aan caawiyo ciyaartoydayada.”