Lionel Messi ayaa dhaliyey goolkiisii koowaad ee uu u saxeexo Paris Saint-Germain kulankiisii koowaad ee uu u safto naadigiisa intii uu kasoo laabtay Koobka Adduunka, waxaanay xalay garaaceen Angers.
Messi oo ahaa geesiga Argentina ka caawiyey inay ku guuleysato Koobka Adduunka ee ay bishii hore rikoodheyaasha ku garaaceen Faransiiska, ayaa goolka uu xalay dhaliyey waxa uu kusoo qabtay oo uu ku barbarreeyey rikoodh u yaallay Cristiano Ronaldo.
35 jirkan ayaa shabaqa soo taabtay daqiiqaddii 72aad, waxaana ka horreeyey gool-dhalinta ciyaarta furay Nordi Mukiele oo kusoo bilowday booska uu ka maqnaa Kylian Mbappe, waxaanay guushani siisay PSG inay lix dhibcood ku qabato hoggaanka horyaalka.
Goolkan ayaa ahaa midkii 13aad ee uu Lionel Messi dhaliyo xilli ciyaareedkan oo uu 20 kulan u saftay PSG, kuwaas oo siddeed ka mid ah ay yihiin horyaalka Ligue 1, halka shanta kalena ay Champions League iyo tartamada kale iskugu jiraan.
Messi ayaa laba gool dhaafay tirada goolashii uu xilli ciyaareedkii hore u saftay PSG, waxaana uu hadda isugeyn kooxdan u saxeexay 24 gool tan iyo markii uu kaga soo biiray Barcelona xagaagii 2021.
Xiddigan oo 778 ciyaarood oo uu u dheelay Barcelona usoo dhaliyey 672 gool, ayaa waxa marka loogu geeyo tirada goolashiisa PSG uu marayaa 696 gool, waxaanu sidaa ku baarbarreeyey rikoodhka goolasha Cristiano Ronaldo uu ka dhaliyey shanta horyaal ee waaweyn ee Yurub oo uu ka dheelay Premier League, LaLiga iyo Serie A.
Xiddiga reer Portugal ayaa sidoo kale xulka qarankiisa Portugal u dhaliyey 118 gool, waana ciyaartoyga ugu goolasha badan taariikhda kubadda cagta ee dhinaca ciyaaraha caalamiga ah, waxaana uu hadda Messi kaga sarreeyaa shan gool oo uu usoo dhaliyey Sporting Lisbon iyo goolsha xulkiisa.
Ronaldo ayaa Manchester United u dhaliyey 145 gool, Real Madrid na waxa uu u saxeexay 450 gool iyo Juventus oo uu u dhaliyey 101 gool, halka Sporting Lisbon ay shan gool uga diiwaangashan yihiin.
